अध्यादेशं ब्वलंकूगु शंका व ग्याःचिकु
सत्तारुढ नेपाल कम्युनिस्ट पार्टी (नेकपा) यात विभाजनया लँ चायेका बिइ कथं सरकारं सोमबार अध्यादेशमार्फत राजनीतिक दल त्यागसम्बन्धी कानून संशोधन यायेधुंकाः नेपाली राजनैतिक परिवेशय् थीथी शंका व न्ह्यसःत दनावःगु दु । राजनीति दल सम्बन्धी ऐन, २०७३ य् पार्टी कुचा थलेगु लागि केन्द्रीय कमिटी व संसदीय दल निगुलिइ नं ४० प्रतिशत सदस्य दयेमाः । प्रधानमन्त्री ओलीया चाहनाकथं सोमबार हःगु अध्यादेशं पार्टी विभाजनया लागि संसदीय दलय् जक ४० प्रतिशत दयेवं गाःगु प्रावधान दुथ्याःगु दु । सरकारं हःगु उगु अध्यादेशं आः पार्टीदुने अल्पमतय् लाःम्ह धयातःम्ह प्रधानमन्त्री ओलीयात माःसा पार्टी कुचा थलेगु निंतिं लँ चायेका ब्यूगु दु ।
नेकपा स्थायी कमिटी सदस्य भीम रावलं थ्व अध्यादेशयात अनिष्टकारी धकाः ट्वीट याःगु दु । वं धाःगु दु कोरोना संक्रमणं जनताया सुरक्षा यायेत पूवंक राष्ट्रहे एकताबद्ध यानाः न्ह्याः वने माःगु इलय् पार्टीइ गुगु नं कथं सहलह हे मयासें पार्टी विभाजनयात अःपुके कथं व संवैधानिक परिषदय् नियन्त्रण व सन्तुलनया मान्यतायात क्वःथलाः हःगु अध्यादेश अनुचित व देशया निंतिं अनिष्टकारी खः । अथेहे समाजवादी पार्टीया अध्यक्ष उपेन्द्र यादवं सरकारं संघीय लोकतान्त्रिक गणतन्त्र सिधयेकेगु उद्देश्यं अध्यादेश हःगु द्वपं ब्यूगु दु ।
नेकपाया निम्ह अध्यक्ष प्रधानमन्त्री केपी शर्मा ओली व पुष्पकमल दाहाल प्रचण्डदतुइ मतभेद दुगु खँ पिने वयाच्वंगु इलय् प्रधानमन्त्रीं राजनैतिक पार्टी बारेया कानूनयात हिइकाः मन्त्रिपरिषदं हःगु अध्यादेशं नेकपादुनेया विवाद पूवंक हे उलाक्यंगु दु । बालुवाटारय् च्वंगु मन्त्रिपरिषदया बैठकं थुगु खँ क्वःछिइखतं हे हे पूर्व माओवादीया मन्त्रीत प्रचण्ड निवास खुमल्टारय् बैठक च्वंवंगुलिं थ्व खँ पुष्टि याःगु दु । विशेष यानाः थुगु संशोधनं नेकपादुनेया विवादं अल्पमतय् लाःम्ह धयातःम्ह प्रधानमन्त्री ओलीयात ‘सेफ जोन’य् वनेत अःपुगु छथ्वःसिया विश्लेषण दु ।
थ्वया न्ह्यः नेकपाया मेम्ह अध्यक्ष पुष्पकमल दाहालं माधवकुमार नेपालयात ल्हाःतय् कयाः प्रधानमन्त्री विरुद्ध अविश्वासया प्रस्ताव हयेफुगु नं चर्चा जुयाच्वंगु खः । पार्टी दुने हे प्रधानमन्त्रीयात ‘कू’ यायेफुगु संकेत वयेवं प्रधानमन्त्रीं थज्याःगु पलाः ल्व्हंगु खयेफुगु नं अनुमान यानाहःगु दु । गुलिखे नेकपाया नेतातय्सं धाःसा पार्टीदुने अल्पमतय् लाःम्ह प्रधानमन्त्री ओलीं प्रचण्ड लगायतया नेतातय्त ख्यायेत जक थ्व जुक्ति पिकाःगु नं धाःगु दु । गुलिसिनं धाःसा थ्व अध्यादेश नेकपाया लागि मखसें राजपा वा समाजवादीया लागि हःगु खः धाःसां थुकिया औचित्य पुष्टि मजू ।
प्रधानमन्त्री ओलीं आः तुरुन्त दल विभाजन याइ कि थः नेतातय्त ख्यायेत जक थ्व अस्त्र छ्यःगु खः व ला स्वये ल्यं हे दनि तर नेपाललगायत विश्न हे कोरोना भाइरसया संक्रमणं ग्रसित जुयाः संकट जुयाच्वंगु इलय् न्हूगु राजनीतिक हलचल बेमौसमी बाजा खः धकाः टिप्पणी यानाहःगु दु । देश हे छधी जुयाः कोरोना विरुद्ध ल्वायेमाःगु इलय् थज्याःगु ज्याखं झी आम जनतातय् दथुइ थप ग्याःचिकु व शंका अप्वयेका ब्यूगु दु ।
