कोरोना संक्रमणं नेपाःपिने २८ म्ह नेपाःमि मन्त
कोरोना भाइरसया संक्रमणं नेपाःपिने २८ म्ह नेपाःमि व नेपाःया मूलया मनूत मन्त । गैर आवासीय नेपाली संघ एनआरएनँ शनिवाः सार्वजनिक याःगु आंकडा कथं २८ म्ह मनू मदुगु लिसें १ हजार १ सय ६६ म्ह मनू कोरोना भाइरसं संक्रमित जूगु दु ।
कोरोना संक्रमणं दक्कले अप्वः बेलायतय् नेपाःमित मन्त सा दक्कले म्हो आयरल्याण्डय् मदुगु धाःगु दु । एनआरएन अध्यक्ष कुमार पन्तया अध्यक्षताय् गठित उच्चस्तरीय समितिया स्वास्थ समितिं मुंगु तथ्यांक अनुसार बेलायतय् १७, अमेरिका ८, युएई २, आयरल्याण्ड १ म्ह मन्त । सार्वजनिक तथ्यांक कथं आःतक २१ गू देसय् नेपाःमित कोरोना भाइरस संक्रमित जूगु दु । संक्रमित जूगु देय मध्यय् अमेरिकाय् ७ सय, बेलायतय् २ सय, स्पेन १०, यूएइ ७१, जर्मनी ४, पोर्तुगल २२, अष्ट्रेलिया ११, आयरल्यण्ड २२, साउदी अरब ४, कुवेत २१, फ्रान्स १, जापान १, मलेसिया ३, म्यानरमार १, बेल्जियम ४, क्यानाडा ३, स्वीट्डरल्याण्ड ५, मल्टा २, हङकंङ १, व नेपाल ३१ म्ह कोरोना संक्रमित जूगु खँ समितिं न्ह्यथंगु दु ।
