कोरोना भाइरस सम्वन्धी मखुगु खँ लाइक याइपिन्त फेसबुकं चेतावनी बिइगु

छिं फेसबुकय् कोरोना भाइरस सम्वन्धी छुं पोष्ट लाइक याना दियागु दु ला, गुगु पोष्ट लिपा सत्य मखु धकाः प्रमाणित जुल । थज्याःगु ज्याखँ याइपिन्त फेसबुकं आः चेतावनी बिइगु जूगु दु ।

कोरोना भाइरस बारे हानीकारक पोष्ट यदि मोडेरेटरं लिपा लिकाल धाःसा अज्याःगु पोष्ट लाइक वा रियाक्ट याःपिं व कमेन्ट याःपिन्त फेसबुकं आः चेतावनी बिइ । विश्व स्वास्थ्य संगठनं जानकारी ब्यूगु तथ्यय् पिने लाःगु खँय् रियाक्ट याःपिन्त नं थज्याःगु चेतावनी वइ । आः छुं वाः दुने फेसबुक छ्यलीपिन्सं थज्याःगु चेतावनी खनेदइगु धाःगु दु ।

फेसबुक लगायत थीथी अनलाइन प्लाय्‌टफर्मं कोरोना भाइरस सम्वन्धी मखुगु खँ न्यंकीपिन्त पनेत कुतः यानाच्वंगु दु । फेसबुकं कोरोना भाइरस लंकीगु धकाः धयातःगु विज्ञापनयात प्रतिबन्ध नं तःगु दु । अय्‌नं कोराना भाइरस समवन्धी कन्सपेरेसी थ्योरी व थीथी कथंया खोप सम्वन्धी असत्य पोष्ट न्हियान्हिथं अप्वयाच्वंगु दु । कोरोना भाइरसया प्रमाणित मजूगु उपचार सम्वन्धी पोष्ट नं उतिकं हे वयाच्वंगु दु । इन्टरनेटय् मखुगु खँ सम्वन्धि अनुसन्धान याइगु पुचः आभाजया कथं मखु धकाः प्रमाणित जुइ धुंकाः नं फेसबुकय् कोरोना भाइरस सम्वन्धी सच्छि मल्याक मखुगु खँ दसौं लख मनूतय्‌सं खनाच्वंगु दु ।

More Stories Like this