बालं च्वनाच्वंम्ह प्वाथय् दुम्ह मिसायात थनाव्छःगु बुखँ षडयन्त्रमूलक - छेँ थुवाः महर्जन
बालं च्वनाच्वंम्ह प्वाथय् मिसायात थनाव्छत धकाः नागरिक पत्रिकां बुखँ पिकायेवं थुकिया खण्डन सम्वन्धित पक्ष व किपू नगरपालिका वडा नं १० या वडा अध्यक्षसमेतं याये धुंकूगु । थ्वहे झ्वलय् उगु छेँया थुवाः गणेशमान महर्जनं प्रेस काउन्सिल नेपालय् उजुरी दर्ता याःगु दु । महर्जनं अनलाइनमार्फत काउन्सिलय् उजुरी दर्ता याःगु खः ।
उजुरीइ थःगु प्रतिष्ठाय् आँच वइकथं अमानवीय ज्या क्यनेगु नियतं षडयन्त्रमुलक रुपय् फसे याये त्यंगु व थःगु सार्वजनिक सुरक्षाय् आँच वइगु धयातःगु दु । गैरकानूनी ज्या याःगु धैगु सन्देश बिइगु कथंया बुखँ प्रकाशित याःगु हुनिं सम्वन्धित पत्रिका र पत्रकारयात कारवाही प्रक्रिया न्ह्याकेत नं उजुरीइ इनाप यानातःगु दु ।
