कोरोनाभाइरस पनेत बलिउड कलाकारतपाखें आर्थिक ग्वहालि

हलिंन्यंक न्यनाच्वंगु कोरोना भाइरसया संक्रमण भारतय् नं तच्वःगु दुसा थुकियात पनेत भारतीय प्रधानमन्त्री नरेन्द्र मोदीं छगू कोष नीस्वंगु दु । थुगु कोषय् बलिउडया स्टारतय्सं ग्वहालि यायेगु नं अप्वया वःगु दु ।

नांजाःम्ह कलाकार अक्षयकुमारं प्रधानमन्त्रीया थुगु कोषयात २५ करोड भारु लःल्हाःगु दु । अथे हे निर्माता भूषणकुमारं ११ करोड, हाँस्य कलाकार व टिभी ज्याझ्वः संचालक कपिल शर्मां ५० लाख, व कलाकार वरुण धवनं ३० लाख बिइगु घोषणा याःगु दु । मेखे कलाकार मनिष पलं २० लाख व मुरद खेतानीं २५ लाख ग्वहालि यायेगु धकाः धाःगु दु ।

कोरोना संक्रमणया कारणं २१ न्हुतक लकडाउन जुयाच्वंगु भारतय् आःतक १०७१ म्ह संक्रमण जूगु पुष्टि जूगु दुसा उकिइ २९ म्ह मदये धुंकूगु दु ।

More Stories Like this