किपू नगरपालिकाया “नगर सन्देश” बुलेटिन पिदन
किपू नगरपालिकां थःगु ख्वाःपौ (बुलेटिन) पिथंगु दु । “नगर सन्देश” नामं पिथंगु थुगु बुलेटिनया सोमवाः मेयर रमेश महर्जन व उपमेयर सरस्वति खड्का रिजालं विमोजन यानादीगु खः ।
नगरपालिकाय् जूगु बःचाहाकःगु ज्याझ्वलय् उपमेयर रिजालं वाःपतिकं सोमवाः खुन्हु पिदनीगु थुगु ख्वाःपौ (बुलेटिन) मद्दिक पिथनेगु जूगुलिं नगरया हरेक ज्याखँत फयांफत्तले कःघायेगु धयादिल । थौया थुगु पौ न्हापांगु जूगुलिं मगाःमचाः व द्वंविद्वं नं दयेफुगु धयादिसें सकसियां सल्लाह सुझावं भिंकायंकेगु धयादिल ।
नगरपालिकापाखें यानाच्वंगु यक्व हे विकास निर्माणया ज्या लिसें आर्थिक, साँस्कृतिक व सामाजिक ज्या त यक्व हे नगरय् जुयाच्वंसां नं थजाःगु ज्याखँया उचित प्रसार प्रसार याये मखंगुलिं नगरबासीतयत इलय् हे सुसूचित यायेगु तातुनां थुगु बुलेटिन पिथनागु न्ह्यथनादिल ।
नगरपालिकाया हरेक ज्याखँ त पारदर्शीढंगं न्ह्यांवनाच्वंगु व पारदर्शीकथं हे न्ह्याकायंकेगुलिइ थुगु “नगर सन्देश” बुलेटिनं सकारात्मक भूमिका म्हितिगु न्ह्यथनादिल । नगरपालिकाया हरेक सुचं त सहित नगरया गतिविधि कःघाइगु थुगु बुलेटिन नगरया हरेक छेँय् छेँय् थ्यंकेगु कुतः जुइगु नं जानकारी बियादिल ।
ज्याझ्वलय् नगरपालिकाया प्रमुख प्रशासकीय अधिकृत ध्रुवराज आचार्य, लेखा अधिकृत मित्र प्रसाद घिमिरे, वरिष्ठ ईन्जिनियर बालकृष्ण महर्जन लगायत शाखा प्रमुखतय्गु समेत ब्वति दुगु खः ।
News Location:
