३ नं. प्रदेशं नेपाल भ्रमण दँ २०२० या पूर्व तयारी भेला यात
नेपाल सरकारं घोषणा यानातःगु नेपाल भ्रमण वर्ष २०२० (भिजित नेपाल २०२०) या लागिं पूर्व तयारी भेला मंगलवाः यलय् या:गु दु । प्रदेश नं. ३ या उद्योग पर्यटन, वन तथा वातावरण मन्त्रालयया ग्वसालय् जूगु ज्याझ्वलय् नेपालय् दुगु थीथी जातिभाषां दयेकूगु नेपाः सम्बन्धी बृत्तचित्रया उलेज्या यानादीगु दु ।
नेपाःलय् दुगु थीथी जातिभाषां दयेकाःतःगु नेपाः सम्बन्धी जानकारीमूल बृत्तचित्र मध्ये खस नेपाली भाषं दयेकातःगु बृत्तचित्रया प्रदेश नं. ३ या मूख्य मन्त्री डोरमणि पौडेलं ल्यापटपय् प्लेयाना उलेज्या यानादीगु खः । नेपाल भ्रमण दँ २०२० या उलेज्या प्रदेश नं. ३ य् धुलिखेल व येँया बसन्तपुरय् जुइगु नं ज्याझ्वलय् जानकारी ब्यूगु दु । प्रदेश नं. ३ नेपाःया पर्यटनया लागि तसकं महत्वदुगु थाय् धकाः उल्लेखयासें थुगु प्रदेशय् साँस्कृतिक व प्राकृतिकलिसें भौगोलिकरुपं नं तसकं च्वछायेबहःगु थाय् दुगु जानकारी बियादिल ।
ज्याझ्वलय् नेपाल सरकारं घोषणा याःथें थुगु भ्रमण दँय् २० लाख पर्यटक दुकायेया लागि यायेमाःगु थीथी ज्याझ्वःत व उकीया पूर्वाधारतय् बारे ध्वाथुइकादीगु खः। ट्राभल्स एशोसियशन एजेन्सी अफ नेपाल (टान)या सभापति नं नुगः खँ तयादीगु ज्याझ्वलय् संघीय सरकारया पर्यटन मन्त्री योगेश भट्टराई, प्रदेश नं. ३ या पर्यटन मन्त्री अरुण नेपाल लगायतया ब्वति दुगु खः ।
News Location:
