किपूया ज्याथःजिथिपिंत स्वक्वःखुसि सितिकं भ्रमण

किपू नगरपालिका वडा ल्याः ३ या ज्याथःजिथिपिंत स्वक्वःखुसि सितिकं भ्रमण यंकूगु दु । किपू नगरपालिका वडा ल्याः ३ या ग्वसालय् दँयदसं धार्मिक व साँस्कृतिक भ्रमण यंकाच्वंगु खःसा शुक्रवाः स्वन्हुया लागि पर्यटकिय व धार्मिक स्थल पोखरा भ्रमणया नितिं वंगु खः ।

शुक्रवाः सुथय् किपू नगरपालिकाया मेयर रमेश महर्जन, उपमेयर सरस्वति खड्का रिजाल, किपू नगरापालिका वडा ल्याः ३ या अध्यक्ष राजेन्द्र महर्जन, १ या अध्यक्ष हर्ष महर्जन व ९ या अध्यक्ष गंगाराम महर्जनपिंसं खादां क्वखायेका, सिन्हःतिकाः विदाई यानादीगु खः ।

किपू नगरपालिका वडा ल्याः ३ या ९० म्ह ज्याथःजिथिपिंत पोखरा भ्रमणय् यंकूगु खःसा इमित बिचाःयायेत स्वास्थ्यय् प्यम्हलिसें नीम्ह स्वयम् सेवकत नं दुथ्याःगु खः । प्यंगः बसय् वंगु उगु भ्रमण शनिवाः न्हिच्छि पोखरा चाःहिलाः आइतवाः छाब्दी बाराही मन्दिर दर्शनयाका लिहाँवइगु ग्वसाःखलकं जानकारी ब्यूगु दु । लुमंकेबहःजु थ्वयां न्ह्यः लुम्बिनी, मनकामना व जानकी मन्दिरय् चाःहिका हयेधुंकूगु दु ।


किपा : ज्ञानकुमार महर्जन