किपू नगरपालिका व चन्द्रागिरी नगरपालिका दुने न्ह्याकाच्वंगु अप्पा भट्टा चीकीगु
किपू नगरपालिका व चन्द्रागिरी नगरपालिका दुने न्ह्याकाच्वंगु अप्पा भट्टा चीकीगु जूगु दु । अप्पा भट्टां पिहाँवइगु कुंयानां (लकस) वातावरण दुषित जुइगु लिसें स्वास्थ्य समेत नकारात्मक असर असर लानाच्वंगुलिं उगु भट्टा चीकेगु धाःगु खः । छुं न्हि न्ह्यःनिसें उगु भट्टा त चीकेत मागयासें स्थानियत संघर्ष समिति दयेका आन्दोलित जुयाच्वंगु खः ।
स्थानियत आन्दोलित जूगुलिं छुं अप्रिय घटना मजुइमा धकाः येँ जिल्ला प्रशासन ज्याकुथिं बिहिवाः सर्बदलिय मुँज्या तया थ्व खँ क्वःछ्यूगु खः । येँ जिल्ला प्रशासक (सिडिओ) जनक राज दाहालया हे कुतलय् थ्व सर्वदलिय मुँज्या च्वंगु खः । येँ जिल्ला प्रशासन ज्याकू बबरमहलय् च्वंगु मुँज्याय् संघर्ष समितिया पदाधिकारीतलिसें सर्वसाधारण जनतातय्सं ब्वतिकयादीगु खःसा भट्टा व्यवसायी, चन्द्रागिरी नगरपालिकाया मेयर घनश्याम गिरी, किपू नगरपालिकाया मेयर रमेश महर्जन, नगरपालिकाया वडाध्यक्षलिसें उद्योग मन्त्रालयया वातावरण विभागया पदाधिकारीपिनिगु नं ब्वति दुगु खः ।
संघर्ष समितिया पदाधिकारीतय्सं स्वास्थ्य प्रतिकूल असर लाःगुलिं गुगुनं हालतय् अनं भट्टा चीकेमाःगु माग याःगु खःसा भट्टा व्यवसायीतयसं उद्योग मन्त्रालयस आधिकारीक रुपं दर्ता याना न्ह्याकाच्वनागु उद्योग खारेज मयायेत इनाप याःगु खः । बरु वातारणिय असर जूसा उकीयात निश्चित मापडण्ड दुने च्वना ज्या याकेत इनाप याःगु खःसा न्हू-न्हूगु प्रविधि वयाच्वंगुलिं उकीयात नालाः वातावरणि लिसें स्वास्थय् नं म्हो जक असर लाइकथं ज्या याकेत इनाप याःगु खः । उद्योग विस्थापन याना देय् समृद्धि जुइमखु धासें थःपिनिगु यक्व हे लगानी लानाच्वंगुलिं नं उद्योग चलेयाकेबीमाःगु माग याःगु खः ।
चन्द्रागिरी नगरपालिकाया मेयर घनश्याम गिरीं नगरपालिकाया बोर्डं मुक्कं भट्टा चीकेगु निर्णय यानातयेधुनागु जूगुलिं नगरपालिकाया निर्णय हे अन्तिम निर्णय खःधासें जनताया चाहना कथं थःपिं जनप्रतिनिधिपिं जुइमाःगुलिं नं भट्टा अनं चीके हे माःगु न्ह्यथनादिल । बरु भट्टा चीकेत छुं ई माःसा प्रक्रियागतढंगं निश्चित ई या दुने चीकेत उजं बियादिल । किपू नगरपालिकाया मेयर रमेश महर्जनं किपू नगरपालिकां न्हापाया जनप्रतिनिधिया इलय् हे नगरपालिका दुने भट्टा त मतयेगु निर्णय यानातःगु लुमंकादिसें स्वनिगलय् अप्पा भट्टा तये हे मज्यूगु बिचाः तयादिल । चन्द्रागिरी नगरपालिकाय् चलेयानाच्वंगु आपाःलं भट्टातयसं किपू नगरपालिकाय् च्वंगु जग्गाया चा ल्ह्ययाच्वंगुलिं व ज्यायात न्हापा हे प्रतिवन्ध तयातयागु धयादिल ।
जिल्ला प्रशासक (सिडिओ) जनकराज दाहालं निश्चित प्रक्रिया पूवंका जक भट्टा चीके माःगु जूगुलिं सर्वपक्षिय समिति दयेका उगु समितिया प्रतिवेदनकथं निश्चित ई या दुने भट्टात चीकेत उजं बिसें उगु सर्वपक्षिय समिति दयेकेत उजं बियादिल ।
किपाः ज्ञानकुमार महर्जन
News Location:
