कलाकार सुर्दशन राजोपाध्याययात भारतय् सम्मान याइगु
स्वगु दशक निसें संगित साधना यानाच्वनादिम्ह कलाकार सुर्दशन राजोपाध्याय (उस्ताद यसराज) यात भारतय् सम्मान याइगु जुगु दु । वयकयात भारतया एन.आर.वी. फाउन्डेसन व भव्या इन्टरनेशनलं इन्डियन बेस्टिज अवार्ड–२०१९ पाखें सम्मान याइगु धकाः शनिवाः रिपोर्टर्स क्लबय् जुगु पत्रकार सम्मेलनय् जानकारी ब्युगु खः ।
थःयात बिइत्यगु सम्मानया बारेय् नवासें वरिष्ठ सरोद वादक, संगितकार, गायक लिसें रचनाकार न जुयादिम्ह राजोपाध्यायं संगितया माध्यमं नेपाल व भारत दथुइया सम्बन्ध विस्तार कलाया माध्यम यायेखगुलिइ थः लसतां जागु धयादिल । उगु सम्मानं सम्मानित जुइ खना संगित क्षेत्रय् थम्ह यानागु ज्याया उच्च मूल्यांकन जुगु धकाः वयकलं धारणा तयादिल ।
पत्रकार सम्मेलनय् नवासें रिपोर्टर्स क्लब नेपालया सभापति ऋषि धमलां कलाकार राजोपाध्यायलं नेपाःया नां कला व संगितया माध्यमं संसारयात म्हसिका च्वगु धासें वयकयात यायेत्यगु सम्मानं वयक छम्हसिया जक सम्मान मजुसें फुक्क नेपामीया गौरव जुगु व संगित व स्रष्टाया सम्मान जुगु धकाः धयादिल ।
वइगु असार २९ , जूलाई १४ य् राजस्थानय् जुइगु अन्तरराष्टिय मैत्री सम्मेलनय् कलाकार राजोपाध्याययात इन्टरनेशनल इन्डियन बेस्टिज अवार्ड–२०१९ लल्हायेत्यगु व ज्याझ्वलय् नेपाः नाप भारत, मालदिभ्स लगायतया देशपाखें न सहभागिता दइ धकाः पत्रकार सम्मेलनय् जानकारी ब्युगु खः ।अथेहे अन्तरराष्टिय मैत्री सम्मेलनय् राजोपाध्यायया सरोद वादनया ज्याझ्व न जुइ ।
सन् २०१३ य् भारतया पश्चिम बंगाल सरकारपाखें संगित मंजरीया उपाधि कयादिम्ह राजोपाध्याययात २०१५ य् गुजरातय् सुरिल साँझयापाखें स्वर्णपत्र प्रदान यागु खः । अथेहे सन् २००२ य् रेडियो नेपालय् जुगु जिल्लाव्यापी संगित प्रतियोगिताय् न्हापं जुयादिगु खः ।
अथेहे, शास्त्र सम्मान २०१८, सेभ दी नेशन अवार्ड लगायत आपालं सम्मानपाखें सम्मानित जुयादिम्ह वयकया नेपाली व नेपाल भाषाया नाजागु पलपल, पानीसरी, त्यो रात, नसला, हसना, छन्ह्, निन्ह्, छगू मतिना लगायतय क्यासेट लिसें सिडीत पिहाँवयेधुक्कुगु दु ।
जापानी भाषाय् न म्हे हालादिम्ह वयकया शास्त्रीय संगितपाखें वन डे रागाज, सोलफूल म्युजिक फर मेडिटेसन, भारतपाखें सुरिल म्यूजिक इन २०१५ प्रकाशित जुगु दु।
