धादिङ्गया गल्छिइ न्हापांखुशि न्हूदँया र्याली पिदन
नेपाल संवत् ११३९ न्हूदँया लसताय् धादिङ्ग जिल्लाया गल्छि गाउँपालिकाय् न्हापांखुसि न्हूदँया र्याली पिदंगु दु ।
नेवाः देय् दबू, गल्छि गाउँपालिका, धादिङ्गया ग्वसालय् पिदंगु थुगु ¥यालीया बिहिवाः कछलाथ्व पारु न्हूदँखुन्हु अमलेश्वर महाःद्यःथाय् गल्छि गाउँपालिकाया नायः कृष्णहरि श्रेष्ठं उलेज्या यानादीगु खः ।
थुगुु र्याली बैरेनि बजार, गल्छि बजार चाःहिलाः छांगेश्वरय् थ्यंकाः ¥याली क्वचायेकूगु खः । र्यालीइ येँ नं दबुलि नेपाल व थिमिया बिनायक शिक्षा निकेटनया पीन्याम्हेसिया टोलिं धिमे, बाँसुरी सहित थीथी साँस्कृतिक झाँकित न्ह्यब्वःगु खः ।
समापन ज्याझ्वलय् येँ धादिङ्ग न्हूदँ ¥याली टोलिया कजि तुलसी हरि प्रजापति विशेष पाहाँकथं झायादीगु खःसा पाहाँकथं गल्छि गाउँपालिका वडा नं. ६ या अध्यक्ष राजन श्रेष्ठ, गल्छि गाउँपालिकाया नेकपाया प्रतिनिधि व नेपाली काँग्रेसया प्रतिनिधिलिसें थीथी खलः/पुचःया प्रतिनिधि झायादीगु खः ।
ज्याझ्वलय् विशेष पाहाँकथं झायादीम्ह प्रजापतिं नेपाल संवत् व थुकिया महत्वलिसें नेपाल संवत् नेवाःतय्गु जक मखुसें सकल नेपाःमिपिनिगु थःगु है मौलिक संवत् जूगु व थ्व बैज्ञानिक नं जूगु खँ तयादीगु खः । मूपाहाँ गल्छि गाउँपालिकाया नायः कृष्णहरि श्रेष्ठं नेपाल संवत् ११३९ न्हूदँया भिंतुुना बियादिसें न्हापांखुशि न्हूदँ ¥यालीइ ब्वतिकायेखनां तसकं लसता वःगु धयादिल । मेमेगु दँय् नं अझ झःझः धायेक न्हूदँ हनेगु बचं बियादिसें झीगु कला व झीगु संस्कृति हे झीगु म्हसीका जूगुलिं थुकियात ल्यंकाः तयेमा धकाः नं धयादिल । थुकियालागि गल्छि गाउँपालिकापाखें माःगु ग्वहालि यायेगु बचं नं बियादिल ।
थीथी पार्टीया प्रतिनिधि पाहाँपिंसं नं न्हूदँया भिंतुना बियादिसें थुगु न्हापांखुशिया र्याली तसकं च्वछायेबहःजूगु न्ह्यथसें थुकीयात निरन्तरता बियावनेमाःगु खँय् बःबियादिल ।
सभाया नायः हिराकाजी श्रेष्ठं थुगु ¥यालीइ ब्वतिकयादीपिं सकलसित सुभाय् देछासें लिपा लिपा हाकनं भाय्, कला व सम्पदा थेंजाःगु ज्याझ्वःत अझ धिसिलाक न्ह्याका यंकेगु व थुकिया लागि सकलसिगु ग्वहालि दइ धइगु आशायासें सभा क्वचायेकूगु खः ।
किपा : तुलसी हरि प्रजापति
News Location:
