धादिङ्गबेसीइ शंखधर पार्क दयेकीगु
नेपाल संवत् ११३९ न्हूदँया झ्वलय् धादिङ्ग जिल्लाया सदरमुकाम धादिङ्गबेसीइ तःजिक ¥याली पिदंगु दु । नेपाल संवत् ११३९ मूल समारोह समिति धादिङ्गबेसीया ग्वसालय् जूगु ¥यालीइ येँ नं दबुलि नेपाल व थिमिया बिनायक शिक्षा निकेटनया पीन्याम्हेसिया टोलिं धिमे, बाँसुरी सहित थीथी साँस्कृतिक झाँकित न्ह्यब्वःगु खः ।
बिहिवाः कछलाथ्व पारु न्हूदँ खुन्हु पुछार बजारय् मूपाहाँ निलकण्ठ नगरपालिकाया मेयर भिम प्रसाद ढुंगानां त्वाःदेवाय् मत च्याका: उलेज्या यानादीगु ¥याली बिचबजार जुयाः शितलबजार चाःहिउगु खःसा अनं धादिङ्ग उद्योग बाणिज्य संघया ख्यलय् वयाः क्वचायेकुगु खः । ¥याली ब्वति कायेत थ्यंकादीपिं सकलसित पुछार बजारय् नेवाः परम्परा कथं खेँय् सगं बियाः क्वखां क्वखायेकूगु खःसा ८४ दँ निसें ९७ दँ दुपिं ३८ म्ह ज्याथःजिथिपिंत स्वांमाः क्वखायेका दोसल्लां न्ययेका: हंगु खः । दक्कले ज्याथःम्ह ९७ दँया रण बहादुर रानामगर खःसा दक्कले जिथिम्ह वयक:या हे जहान ९६ दँया एक कुमारी रानामगर खः ।
समापन ज्याझ्वलय् नेवाः देय् दबूया सल्लाहकार भुपेन्द्र कुमार श्रेष्ठं लसकुस यानादिसें नेपाल संवत् व थुकीया प्रणेता शंखधर साख्वाःया बारे ध्वाथुइकादीगु खः । ज्याझ्वलय् छगू दशक न्ह्यःनिसें साँस्कृतिक झाँकिसहित ¥याली पिथनेत हःपा बियादीम्ह विशेष पाहाँ संस्कृतिविद् व दबुलि नेपालया संरक्षक गणेशराम लाछियात नं मूपाहाँ मेयर ढुंगानां हनापौ लःल्हानादिसें दोसल्लां न्ययेका हनादीगु खः ।
न्हूदँया लसताय् ग्वसाखलकं नगरदुने दुगु ३० टोलयात दुथ्याका सुचुपिचु धेधेंबल्ला हे याकूगु खः । उकि मध्ये दक्कले बांलाक सुचुपिचु लिसें व्यवस्थित जूगु बिचबजार टोल सुधार समितियात न्हाप सिरपा घोषणा लिसें मूपाहाँ पाखें दसि पौ लःल्हाना ब्यूगु खः ।
विशेष पाहाँ कथं झायादीम्ह संस्कृतिविद् व दबुलि नेपालया संरक्षक गणेशराम लाछिं ग्वसाखलःयात सुभाय् बिसें शंखधर साख्वालजुं नीस्वनाथकूगु नेपाल संवतया उत्पतिया बारे थीथी तर्क त दयाच्वंगुया बारे ध्वाथुइकादिल ।
मूपाहाँया थासं न्ववानादिसें निलकण्ठ नगरपालिकाया मेयर ढुंगानां नगरदुने प्यंगू पार्क दयेकेगु ज्या जुयाच्वंगुलिं उकीमध्ये छगू शंखधर पार्क दयेकेगु घोषणा यानादिल । थुगु शंखधर पार्क दयेकेया लागि माःगु ग्वहालि यायेगु बचं नं बियादिल । अथेहे थुगु ज्याझ्वःया दथुइ याःगु नगरया सुचुपिचु थुगु ज्याझ्वःज्वःछिजक सिमित मजूसें न्ह्याबलें हे न्हियान्हिंथं हे थथे हे नगर सुचुपिचु यायेत न्ह्यचिलेत नं इनाप यानादिल ।
ग्वसाःखलःया कजि गोविन्दकुमार श्रेष्ठया सभानायःसुइ न्ह्याःगु थुगु ज्याझ्वलय् श्रेष्ठं नेपाल संवत् नेवाःतय्गु जक धकाः भ्रम जुयाच्वंगुलिं नेवाःतय्गु जक मखुसें सकल नेपाःमिपिनिगुु हे मौलिक संवत् जूगु खँ कनादिसें नगरया सकल संघ/संस्था, खलः/पुचःतयत थुगु ¥याली ब्वतिकायेत इनाप यानागु कनादिल । लिसें न्ह्याबलें थथे हे झी नेपाःमि छधी छप्पंजुयाः नगर व देयया विकास यायेगु ज्याय् न्ह्यां वनेमाःगु खँ कनादिसें सभा क्वचायेकादीगु खः । ज्याझ्वः झीगु नेवाः समाज धादिङ्गया छ्याञ्जे राजकुमार श्रेष्ठं न्ह्याकादीगु खः ।
ग्वसाःखलकं मंगलवाः धादिङ्ग अस्पतालय् च्वंपिं ल्वगिपिंत फलफूल नं इनेज्या याःगु खः ।
किपाः ज्ञानकुमार महर्जन
News Location:
