श्रीपञ्चमि बचतया खुक्वःगु साधारण सभा जुल
“बचत नै श्रीपञ्चमिको प्रतिवद्धता” धइगु मू नारालिसें किपू नगरपालिका वडा नं. ३, कुतिसा: त्वालय् च्वंगु श्रीपञ्चमि बचत तथा ऋण सहकारी संस्था लिमिटेडया खुक्वःगु साधारण सभा शनिवाः क्वचाःगु दु ।
किपूया नगमयच्वंगु बाघभैरव ब्यांक्वेटय् जूगु थुगु साधारण सभाय् संस्थाया दक्कले क्वकालिम्ह शेयर दुजः सिद्धार्थ मानन्धरयात मूपाहाँ दयेकूगु खः । स्वदँतिनि दुम्ह मूपाहाँ सिद्धार्थ मानन्धरं त्वाःदेवाय् मत च्याकाः ज्याझ्वःया उलेज्या यानादीगु खः ।
नच्चापिं मिसामस्तयसं नेपाःया राष्ट्रिय धून थानां न्ह्याकूगु ज्याझ्वलय् संस्थाय् आवद्ध जूपिं थुगु दँय् मदयेधुंकूपिनि लुमन्तिइ छगू मिनेट मौन धारण नं याःगु खः ।
संस्थाया नायः अमर मानन्धरया सभापतित्वय् जूगु ज्याझ्वलय् नायः भाजुं थुगु दँया शेयर पुँजी १ करोड ३० लाख ३६ हजार ४ सय तका, बचत ५ करोड २ लाख ९६ हजार ७ सय २१ तका, कर्जा लागानी ४ करोड, ९३ लाख ६ हजार ७ सय २७ तका, व्याज आम्दानी ६४ लाख ८९ हजार ७ सय ४२ तका व ब्याज खर्च ३३ लाख ७३ हजार ३ सय ३३ तका जूगु बार्षिक प्रतिवेदन न्ह्यब्वयादीगु खः ।
अथेहे संस्थाया कोषाध्यक्ष राजु मानन्धरं आर्थिक प्रतिवेदन, लेखासमितिया कजि हिराकाजी मानन्धरं लेखा प्रतिवेदन न्ह्यब्वयादीगु खः । संस्थाया न्वकू बेखानारायण मानन्धरं लसकुस यानादीगु थुगु ज्याझ्वलय् कीर्तिपुर बहूउद्देश्यीस सहकारी संस्थाया नायः दिलबहादुर महर्जन, लुमन्ति बचत तथा ऋण सहकारी संस्थाया रामशरण महर्जनं भिंतुना न्वचू बियादीगु खः ।
श्रीपञ्चमि मानन्धर गुथिया हामाय् न्ह्यानाच्वंगु थुगु संस्था गुथिया नायः लिसें संस्थाया सल्लाहकार सिद्धिकुमार मानन्धर व पुलांम्ह नायःलिसें सल्लाहकार राजेन्द्र मानन्धरं नं थःथःगु नुगः खँ तयादीगु खः ।
संस्थाया छ्याञ्जे जुजुकाजी मानन्धरं न्ह्याकादीगु थुगु साधारण सभाया उलेज्या क्वचायेका बन्द सत्र न्ह्याकुगु खः । श्रीपञ्चमि बचत तथा ऋण सहकारी संस्थाय् ३४३ म्ह शेयर दुजःपिं दु ।
किपा : ज्ञानकुमार महर्जन
