किपुलिइ ऐतिहासिक पार्क दयेकीगु
किपुलिइ पर्यटन बिकासया लागि धकाः छगू न्हूगु पार्क दयेकीगु जूगु दु । ऐतिहासिक पार्क जुइगु धकाः दाबियाःगु थुगु पार्क दयेकेगु विषयस शनिवाः छगू कार्यशाला गोष्ठी याःगु खः ।
तात्कालिन “किपू युद्ध” पृथ्वीनारायण शाहया पालयृ जूगु किपू युद्धय् पृथ्वीनारायण शाह निकःतक बूगु इतिहास दु । थ्वहे इतिहासयात कःघानां थुगु पार्कय् उबले जूगु घटनात फयांफच्छि जिवित कथं थें हे स्वयेदइगु ग्वसाःखलकं जानकारी ब्यूगु खः । इतिहासय् उल्लेख जुयाच्वंगु हे थाय् किपूया उत्तर पूर्वपाखेच्वंगु “गःसी” धाःगु थासय् थुगु पार्क दयेकीगु खः ।
कार्यशाला गोष्ठीया उलेज्या यानादिसें मूपाहाँ ३ नं. प्रदेशया पर्यटन मन्त्री अरुण नेपालं इतिहासयात जिवित स्वयेदइकथंया पार्क दयेकाः पर्यटक सालेगु थ्व छगू मूवंगु ज्या धयादिसें थजाःगु बांलाःगु ज्याया लागि प्रदेश सरकारं माःगु ग्वहालि यायेगु बचं बियादिल ।
किपू नगरपालिकाया मेयर रमेश महर्जनं समृद्धि किपूदयेकेया लागि थजाःगु ज्या आः मद्दिक्क हे न्ह्याका वनेगु धयादिसें मेमेगु पर्यटकिय सम्भाब्यता दुगु योजना समेत कनादिल । छुं न्हि तिनि विश्व पर्यटन दिवसया लसताय् किपूनगरपालिका वडा नं.३ य् दुगु न्हापा ल्हाकाः हे तयेधुंकूगु पुखुलिइ व्यवसायिक कथं डुंगा चलेयाःगु खः ।
सभापतिया थासं न्वंवानादिसें ग्वसाः खलः कीर्तिपुर पर्यटन पूर्वाधार निर्माण तथा व्यवस्थापन समितिया नायः सुरेन्द्र मान्नधरं थ्व पार्क दयेका तात्कालिन किपू युद्ध व उकी किपूमिपिनिगु वीरता खनेदइसा किपूमिपिनिसं शत्रु भाःपियाच्वंम्ह पृथ्वीनारायण शाहया जयजयकार नं मखु व निरंशुस शाशक धकाः नं मधाःसे यथार्थ चित्रण जक यायेगु धकाः ध्वाथुइकादिल । थुकिंयाना पर्यटकिय गन्तब्य अवश्य जुइगु विश्वास प्वंकादिल ।
किपूया हिलसाइट होटेलय् जूगु कार्यशाला गोष्ठीइ ग्वसाःखलःया दुजः प्रयागमान प्रधानं “पर्यटन विकास–ऐतिहासिक पार्क निर्माण”या प्रस्तावना मस्यौदा न्ह्यब्वयादीगु खःसा पुलांम्ह सहायकरथि डा. प्रेमसिंह बस्न्यातं नेपाःया जमिन न्हियान्हिथं कतः देसं त्यलाकयाच्वंगु प्रति च्यूताः प्वंकादिल ।
इतिहास विषयया प्रा.डा. भवेश्वर पंगेनीं इतिहासयात दुवाला थःगु खँ न्ह्यब्वयादीगु थुगु ज्याझ्वःलय् ग्वसाःखलःया दुजः बज्रमुनि बज्राचार्यं लसकुस यानादीगु खःसा ग्वसाः खलःया न्वकू योगेन्द्र थापां न्ह्याकाःदीगु खः ।
किपाः ज्ञानकुमार महर्जन
