पद्मरत्नया ज्या जंक्वःया लसताय् साँस्कृतिक ज्याझ्वः

नेवाः न्ह्यलुवा, आदिवासी जनजाती आन्दोलनया अगुवा, मानवअधिकार आन्दोलनया वरिष्ठ अभियन्ता भाजु पद्मरत्न तुलाधरया ज्या जंक्वया लसताय् वयकलं हे च्वयातःगु थीथी ख्यालः न्ह्यब्वयेगु नितिं छगू साँस्कृतिक ज्याझ्वः शनिवाः जुल ।

येँयया राष्ट्रिय सभा गृहया हलय् जूगु साँस्कृतिक ज्याझ्वलय् भाजु तुलाधरं च्वयातःगु स्वंगू ख्यालः न्ह्यब्वःगु खः । इमेज च्यानलय् न्ह्यानाच्वंगु लोकंह्वाःगु टेलिसिरियल समयबजिया पुचःलं “जिं लातकि” ख्यालः न्ह्यब्वःगु खःसा, सुरेन्द्र मानन्धर, रेवन्तलाल श्रेष्ठ, रजनि आदिपिं कलाकारपिंसं थुगु ख्यालः म्हिताःदीगु खः । नेपालमण्डल टेलिभिजनय् न्ह्यानांच्वंगु लोकंह्वाःगु टेलिसिरियल ड्याड् सन् एण्ड मम् पुचलं “वा वल, फय् वल” ख्यालः न्ह्यब्वःगु खःसा कलाकारपिं आर्यम नकःमिं, अर्णेश्वरी श्रेष्ठ व सविन शाक्यं म्हिताःदीगु खः । अथेहे थीथी ख्यालःम्वःपिं आशाकाजी थकुं, शरद कसाः, सानुराजा (सारा) वज्राचार्य, व उमेश स्थापितपिं जानां पद्मरत्नया मेगु लोकंह्वाःगु ख्यालः “जन्तर” न्ह्यब्वःगु खः ।

ज्याझ्वलय् इन्द्रेणी साँस्कृतिक समाजं पद्मरत्नयात ज्या जंक्वया भिंतुना बिसें म्येँ व हुलाप्याखँ न्ह्यब्वःगु खःसा लोकंह्वाःम्ह म्येँहालामि रामकृष्ण दुवालं पञ्चायत इलय् राष्ट्रिय पञ्चायत सदस्यया चुनाबय् जनपक्षिय उम्मदेवार जुयादीम्ह पद्मरत्न तुलाधरया चुनाबी म्येँ “सुर्द्यः चिन्हय् छाप तयाः पद्मरत्न त्याकादिसँ न्हां ...” बोलया म्येँ न्ह्यब्वःगु खः । कलाकार भोगेन्द्र मानन्धरं काल भैरव नृत्य न्ह्यब्वयादीगु खःसा लोकंह्वाःपिं कलाकारपिं जुजुकाजी रञ्जित व पवित्र कसाः व लोक कवि राजभाइ जकःमिं नं म्येँ न्ह्यब्वयादीगु खः ।

ज्याझ्वःया लिपांगु इलय् ख्यालि जुजु मदनकृष्ण श्रेष्ठं ख्यालि खँ व म्येँ न्यंकादिसें ज्या जंक्वया लसताय् भाजु पद्मरत्न तुलाधारयात भिंंतुना बियादीगु खः । ज्याझ्वः सुरजबीर वज्राचार्यं न्ह्याकादीगु खः ।