नेवाः भाय् सयेकःवयाच्वंपिं भारतिय नेवाःतयसं नेवाः वस्ति किपू भ्रमण यात
भारतया थीथी राज्यय् च्वंपिं नेवाः भाजु मय्जुपिं थःगु नेवाः भाय् लिपि, संस्कार, संस्कृति, प्याखँ व बाजं सयेकेया लागि स्वनिगः वयाच्वंपिंसं शनिवाः ऐतिहासिक नेवाः थाय् 'किपू' अबलोकन भ्रमण यानादीगु दु ।
दबुलि नेपालया ब्वनाय् भारतया आसाम, पश्चिम बंगाल, सिक्किम, अरुणाञ्चल प्रदेश आदिया नीनिम्ह नेवाः त प्रशिक्षक जुयेया नितिं नीन्यान्हु न्ह्यःनिसें थिमिया विनायक शिक्षा निकेतन स्कूलय् च्वनां नेवाः भाय् लिपि संस्कृति, सस्कार, प्याखँ व बाजं सयेका च्वंगु खः ।
लच्छियंक जुइगु थुगु निःशुल्क तालिमया झ्वलय् प्रत्येक शनिवाः नेवाः बस्तिया अबलोकन भ्रमण यायेगु ज्याझ्वः नं तयातःगु खः । थुकिया हे सिलसिलाय शनिवाः किपूया भ्रमण याःगु खः ।
किपूया ब्याँचुलि साँस्कृतिक पुचःया नायः लक्ष्मीकुमार महर्जनं किपू गेटय् तःजिक लसकुस यानादिसें किपूया बारे जानकारी नं बियादीगु खः । नेवाः परम्परा कथं खेँय् सगं बियाः कोखां कोखाय्काः लसकुस याःगु खःसा धिमे थानां किपूया थाय् थासय् चाःहिकुगु खः।
किपूया ऐतिहासिक थाय् त चिलंच्व विहार, बाघ भैरव व उमामहेश्वर (क्वाःच्व) देय्गःया अबलोकन धुंकाः किपू नगरपालिकाय् थ्यंकूगु खः ।
किपू नगरपालिकाया उप प्रमुख सरस्वति खड्कां नं खादां न्ययेकाः लसकुस यानादिसें भारतं निसें थःगु पहिचानया लागि स्वनिगःथ्यंक वया सयेकः वयाच्वंगुलिं लसता प्वंकूसें बांलाक सयेकेफयेमा धकाः भिंतुना बियादिल ।
ज्याझ्वलय् किपू नगरपालिकाया भाषा, संस्कृति, पर्यटन समितिया कजि लिसें २ नं. वडाया अध्यक्ष रमेशमान डंगोलं नं थःगु नुगः खँ तयादिसें लसकुस यानादीगु खः । दबुलि नेपालया कजि संस्कृतिविद् गणेशराम लाछिं भारतया नेवाःतलिसेया स्वापू शुरु जूगु सन १९९३ स सिक्किमेलिपिंलिसें अनच्वंपिंत माःगु नेवाः पहिचानया लागि ग्वहालियानागुनिसें आः जुयाच्वंगु निःशुल्क तालिमया औचित्यबारे ध्वाथुइका बिल ।
ज्याझ्वलय् १ नं. वडाया अध्यक्ष हर्ष महर्जन, ९ नं. वडाया अध्यक्ष गंगाराम महर्जन, भाषाविद् डा. तुयु बहादुर महर्जनया नं उपस्थिति दुगु खः। थुगु लच्छियंक जुइगु निःशुल्क तालिमया थ्वहे भाद्र ३१ गते न्हिनसिया १२ः३० ताः इलय् थिमिया यचु पार्टी पालेय् समापन यायेगु ग्वसाःखलः दबुलि नेपालं जानकारी ब्यूगु दु ।
किपा : ज्ञानकुमार महर्जन
