किपुलिइ थीथी कलाकारपिंत हन
किपूया नांजाःम्ह उस्ताद् मदुम्ह गोविन्द “किपू”या लुमन्तिइ सोमवाः छगू सांगीतिक ज्याझ्वः यासें थीथी कलाकारपिंत हंगु दु । दँयदसं यानावयाच्वंगु थुगु ज्याझ्वः थुगुसी प्यक्वःखुसी जूगु खः ।
भगवान श्रीकृष्णया जन्माष्टमिया लसताय् “कलाकार गोविन्द किपू फाउण्डेशन” व किपू नगरपालिका वडा नं. ३, कुतिसाः त्वाःया मंकाः ग्वसालय् कुतिसाः त्वालय् थुगु ज्याझ्वः जूगु खः । कुतिसाः त्वाःया हे नलः स्वाँ खलःया ग्वहालिइ थुगु ज्याझ्वः जूगु खः।
ज्याझ्वलय् कुतिसाः त्वाःया गुरुपिं बुद्धिराज महर्जन (धिमे), ज्ञानेश्वर “निभाः” (दाफा) व कुलबहादुर महर्जन (खिं) लिसें नेवाः संकिपाया नकिं किपूया म्ह्यायमचा हिराशोभा महर्जन (हिसिला), साहित्यकार अशोक शोकि, पत्रकार ललेन्द्र शाक्य, फोटोग्राफर नृपेन्द्रलाल श्रेष्ठ, तेजमान बज्राचार्य व लोकंह्वाःगु टिभि ज्याझ्वः समयबजिया सुरेन्द्र मानन्धरपिंत मूूपाहाँ सुरसुधाया वरिष्ठ तबला बादक सुरेन्द्र श्रेष्ठं हनापौ लःल्हानादिसें हंगु खः । गोविन्द किपू फाउण्डेशनया नायः दिलिप 'किपू'मिं खादां क्वखायेका हनादीगु खः ।
मचाम्ह कलाकार इनाप महर्जनं कीबोर्डय् नेपाःया राष्ट्रिय म्येया धून थानां न्ह्याकूगु प्यक्वःगु साँस्कृतिक व हना ज्याझ्वलय् उस्ताद् गोविन्द 'किपू'या शिष्य व संगीतकार ज्ञानेश्वर “निभाः”, कलाकार हिराशोभा महर्जन (हिसिला) व निर्देशक पवन जोशीं मदुम्ह गोविन्द 'किपू'या बारे थःथःगु नुगः खँ तयादीगु खः ।
इमेज च्यानलय् वइगु नेवाः ज्याझ्वः समयबजिया सुरेन्द्र मानन्धर पुचलं ख्यालः व म्येँ न्ह्यब्वसें मुक्तक न्यंकाः न्ह्याकापुकादीगु खः ।ज्याझ्वलय् रत्नशोभा महर्जन, स्टेला महर्जन व प्रशंसा गोपाली, अटुल मानन्धर, जः ब्याण्डया दिनेश महर्जन व राजु महर्जन, लक्ष्मी महर्जन, ज्ञानेश्वर “निभाः”, मचाम्ह कलाकार उमंग मानन्धर व उदय मानन्धरपिंसं म्येँ गजल व हुलाप्याखँ न्ह्यब्वयादीगु खः।
पञ्चामृत ब्याण्डं फ्यूजन नं न्ह्यब्वयादीगु ज्याझ्वलय् किपूया सायाःया झ्वलय् पिदंगु लोकंह्वाःम्ह निर्देशक पवन जोशीया निर्देशनय् व वज्रमुनि वज्राचार्यं च्वयादीगु “बजि नकेगु” ख्यालः नं न्ह्यब्वःगु खः ।
ज्याझ्वः ललेन्द्र शाक्यं न्ह्याकादीगु खः ।
किपाः ज्ञानकुमार महर्जन
