नेवाः भाय् व संस्कृतिया प्रशिक्षक प्रशिक्षण ज्याझ्वः न्ह्याकल
दबुलि नेपालं नेवाः भाय् व संस्कृतिया प्रशिक्षक प्रशिक्षण ज्याझ्वः न्ह्याकूगु दु । भारतया थीथी राज्यं झायादीपिंत थुगु प्रशिक्षण ज्याझ्वः न्ह्याकूगु खः ।
प्रशिक्षित जुइत भारतया आसाम राज्यं ७ म्ह, अरुणाञ्चल राज्यं ६ म्ह, सिक्किम राज्यं ४ म्ह, दुअर्स राज्यं ४ म्ह व कालिम्पोङ्ग राज्यं १ म्ह याना मुक्कं २२ म्हेसिया ब्वति दु । १३ म्ह मिजंपिं व ९ म्ह मिसापिं प्रशिक्षार्थीपिंत लच्छितक थुगु प्रशिक्षण न्ह्याकीगु खः ।
ज्याझ्वःया शनिवाः मध्यपुर थिमिया बिनायक शिक्षा निकेतनय् उलेज्या याःगु खः । मध्यपुर थिमि नगरपालिकाया मेयर भाजु मदन सुन्दर श्रेष्ठं त्वाः देवाय् मत च्याकाः उलेज्या यानादीगु खः । उलेज्या यानादिसें मेयर श्रेष्ठं नेवाःतय् तलिजलि विश्वय् हे उत्कृष्ट जूगुलिं झीगु लिसें तलिजलि च्वन्ह्याकेगुया लागि विदेश (भारत)य् समेत न्यनावंकेत जुयाच्वंगु थुगु प्रशिक्षण प्रशिक्षण तसकं च्वछायेबहःजू धयादिल । मेयर श्रेष्ठं थिमि नं नेवाः भाय् व तजिलजिं बिलबिलि जाःगु हुनिं आः याकनं हे थिमि देय्यात हे जिवित संग्रहालय (लाइभ म्युजियम) दयेकेगु व उकिया लागि थ्यंमथ्यं ५० लख दांया बजेट समेत फ्यायेधुनागु कनादिल ।
ज्याझ्वलय् नेपाल भाषा केन्द्रीय विभागया प्रमुख ओमकारेश्वर श्रेष्ठं स्वनिगलय् आः नेवाः विश्वविद्यालय दयेकेमाःगु खँ न्ह्यथनादिल । ग्वसाः खलःया नायः ई. सन्तोष प्रजापतिया नायःसुइ जूगु ज्याझ्वलय् ज्यापु संस्कृति विकास कोषया नायः मंगल सिंहजुं न्याज्वः धिमे व भूस्याः ग्वहालि कथं लःल्हानादीगु खःसा नेवाः नुगःया पवित्र वज्राचार्य व डा. पञ्च नारायण महर्जनं दां ग्वहालि लःल्हानादीगु खः ।
वर्ड नेवाः अर्गनाइजेसनया नायः सिजन श्रेष्ठं नं थःगु नुगः खँ तयादीगु ज्याझ्वलय् प्रशिक्षक जुयादीपिंत प्रशिषणयानादीपिं भाषा स्यनादीम्ह जुजुमान महर्जन, लिपि व व्याकरण स्यानादीम्ह शरद कसाः, बाजं स्यनादीम्ह विष्णु बहादुर प्रजापति, प्याखँ स्यनादीम्ह बालमुकुन्द प्रजापति, नेवाः संस्कार स्यानादीम्ह स्वयम्भु गुरुजु व संस्कृति स्यानादीम्ह हरिशंकर राजोपाध्याययात नं हनादीगु खः ।
ज्याझ्वः वरिष्ठ संस्कृतिविद् व ज्याझ्वःया कजि गणेशराम लाछिं न्ह्याकादीगु खः । ज्याझ्वः क्वचायेवं प्रशिक्षार्थीपिंत नेवाः वस्ति लुभु, ख्वना व पाटनय् स्थलगत भ्रमण याकूगु खः ।
