वर्ल्ड नेवाः अर्गनाइजेशनया न्हूम्ह नायलय् भाजु सिजन श्रेष्ठ
वर्ल्ड नेवाः अर्गनाइजेशनया न्हूम्ह नायलय् भाजु सिजन श्रेष्ठयात निर्विरोध ल्यःगु दु । अर्गनाइजेशनया न्हूगु ज्यासना पुजः निर्वाचनया लिच्वः निक्वःगु हलिं नेवाः मुँज्याया झ्वलय् निर्वाचन समितिया नायः डा. महेश्वर वैद्यं थुगु लिच्वः न्यंकादीगु खः ।
न्हूगु समितिइ वरिष्ठ न्वकू दया शाक्य, न्वकू डा. नारायण राजभण्डारी, न्वकू स्वयम्भू तुलाधर, मू छ्याञ्जे सुभाषराम प्रजापति , जन सम्पर्क अधिकृत कृष्ण चखुं व दुजः राजिष श्रेष्ठ जुयादीगु दु ।
स्वदँय् छक्वः कार्यसमिति हिलीगु प्रावधान कथं अर्गनाइजेशनया न्हूगु कार्यसमितिया लागि छुं ला न्ह्यःनिसें निर्वाचन प्रक्रिया न्ह्यानाच्वंगु खःसा न्हूगु कार्यसमितिइ २७ म्ह दुजः मध्ये मुक्कं ७ म्हसिया जक मनोनयन वःगु खः । मनोनयनय् लाःपिं दक्वं हे निर्विरोध निर्वाचित जुयादीगु खः । प्वंगु पदय् लिपा मनोनयनपाखें दुजःपिं ल्ययेगु धाःगु दु ।
