गोरखापत्रया प्रधान सम्पादकय् पुष्कर माथेमा
गोरखापत्र संस्थान व्यवस्थापनं गोरखापत्र न्हिपाैया प्रधान सम्पादकया जिम्मेवारी वरिष्ठ पत्रकार पुष्कर माथेमायात ब्यूगु दु । पुस २० गते सोमबारंनिसें लागू जुइगु यानाः वय्कःयात थुगु जिम्मेवारी ब्यूगु खः ।
गोरखापत्र दैनिकया लागि प्रधान सम्पादक जिम्मेवारी कया वयाच्वनादीम्ह कमल रिजालयात मधुपर्क लय्पाैया सम्पादकया जिम्मेवारी ब्यूगु दु ।
अथे हे उगु न्हिपाैया प्रवन्ध सम्पादकया जिम्मेवारी मेम्ह अर्का वरिष्ठ पत्रकार श्रीओमप्रसाद श्रेष्ठयात ब्यूगु दु । वय्कःयात नं पुस २० गतेनिसें लागू जुइगु यानाः उगु जिम्मेवारी ब्यूगु खः ।
प्रधान सम्पादकया जिम्मेवारी न्ह्यव गोरखापत्र अनलाइनया प्रमुखया रूपय् ज्या याना वया च्वनादीम्ह कार्यरत माथेमा थ्व स्वयां न्ह्यः नं गोरखापत्र दैनिक व दि राइजिङ नेपालया प्रधान सम्पादकया जिम्मेवारी काये धुंकूगु दु । माथेमा गोरखापत्रया सह–प्रकाशन युवामञ्च लय्पाैया सम्पादकसमेत जुइधुंकूगु दु ।
वंगु ३० दँनिसें नेपाली पत्रकारिता ख्यलय् क्रियाशील माथेमा २०४५ साल जेठ १८ गते गोरखापत्र संस्थानया नेपाली समूहया उप–सम्पादक जुयाः सेवा प्रवेश यानादीगु खः । जर्मनीस्थित इण्टरनेशनल इन्स्टिच्यूट अफ जर्नलिज्म, डेनिस स्कुल अफ जर्नलिज्म व नेपाल प्रेस इन्स्टिच्यूटपाखें पत्रकारिता प्रशिक्षण कयादीम्ह वय्कलं वातावरण पत्रकारिता पुरस्कारलिसें रङ्गमञ्च व साहित्य सम्बन्धी थीथी सिरपा नं त्याकादीगु दु । वय्कः नेपालभाषाया सफलम्ह कलाकार, च्वमि व वर्ल्ड नेवाः अर्गनाइजेशन नेपाःया दांभरिं नं खः ।
Related Stories
गोरखापत्रया प्रधान सम्पादकय् पुष्कर माथेमा
