दान्यहिरा सिरपा लःल्हात



नेपाल संवत् ११३५ या 'दान्यहिरा सिरपा' थौं छगू ज्याझ्वःयासें लःल्हाःगु दु । वरिष्ठ कलाकार लिसें म्येँहालामि व प्याखँ स्यनामि भाजु भृगुराम श्रेष्ठयात 'दान्यहिरा सिरपा' व संगीत संयोजक लिसें संगीतकार भाजु जुगल डंगोल (प्रेमकुमार महर्जन) यात 'दान्यहिरा हःपा सिरपा' लःल्हासें म्हतिं छसिकथं न्ययेद्वः व नीन्याद्वःतका दां नं लःल्हासें ह‌ंगु खः ।

नेपालभाषा एकेदमिया ग्वसालय् यलया अशोक पार्टी प्यालेसय् जूगु उगु ज्याझ्वलय् नेपालभाषा एकेदमिया चान्सलर भाजु चित्तरञ्जन नेपालीं दसिपौ लःल्हानादीगु खःसा सिरपाया दाता लिसें नेपालभाषा एकेदमिया न्वकू भाजु यज्ञरत्न धाख्वाःजुं दां लःल्हानादीगु खः ।सिरपाया दाता भाजु यज्ञरत्न धाख्वाःया सफू 'बकम्फुसे' (नेपाली अनुवाद) नं मूपाहाँ शताब्दी पुरुष संस्कृतिविद् डा. सत्यमोहन जोशीजुं विमोचन यानादीगु खः।

ज्याझ्वलय् निर्णायक मण्डलयापाखें भाजु रामकृष्ण दुवाल, सिरपाया दाता यज्ञरत्न धाख्वाः, मूपाहाँ डा. सत्यमोहन जोशी, नेपालभाषा एकेदमिया चान्सलर भाजु चित्तरञ्जन नेपाली, सिरपा त्याकादीपिं भृगुराम श्रेष्ठ, जुगल डंगोलजुंपिसं न्वावानादीगु खःसा थीथी म्येँ नं न्ह्यब्वयादीगु खः ।

मय्जु प्रो. प्रेमशान्ति तुलाधरं सिरपा त्याकादीपिनिगु म्हसिका न्ह्यब्वयादीगु खः । नेपालभाषा एकेदमिया सदस्यसचिव भाजु मल्ल के. सुन्दरं लसकुस यानादीगु ज्याझ्वः मय्जु शशिकला मानन्धरं न्ह्याकादीगु खः ।

भृगुराम श्रेष्ठया नेवाः ख्यलय् ज्वःमदुगु योगदान
८२ दँ दयेधुंकूम्ह कलाकार भृगुराम श्रेष्ठं नेवाः ख्यलय् ज्वःमदुगु योगदान यानादीगु दु । वय्कलं लाेक म्येँ नापं जाति भाषाया म्येँ लिसे‌ं मतिनाया म्ये तकं हालादीगु दु ।



वय्क:या लोकंह्वाःगु म्ये थुकथ‌ं दु: -
• झीगु भाषा मन्त धाःसा गय् थ्व नेपाः झीगु जुइ...
• सिरिसिरिं फसं जितः कुचुकुचु नकल ...
• होलिया मेला मय्जुं मस्यूला...
• द्यःयात सिन्हाय् स्वां ...
• असंत्वाःया दबू कुने मिया तःगु ग्वाः ...

जुगल डंगोलया नेवा: सांगीतिक ख्यलय् याेगदान
डंगोलं नेवा: सांगीतिक ख्वलय् यक्व हे याेगदान यानादीगु दु । वय्कलं विशेष याना: म्येँय् लय् चिनादीगु व संगीत संयाेजन यानादीगु दु ।



वय्कलं लय् चिनादीगु लोकंह्वाःगु म्येँय् थुकथं दु: -
• जितः यःम्ह मय्जु छ ...
‌• यः मां ...
• छंगु छन्त हे ...
• इलं हाःगु सः ...
• जिगु मिखाय्...
• झीगु स्वनिगः ...
• स्वयम्भू ज्ञानमाला ...
• हाँसि मलाःम्ह ...

अथेहे वय्कलं निगू दर्जनसिबें मयाक म्येँय् संगीत संयोजन नं यानादीगु दु ।

उकी मध्ये लाेकंह्वा:गु म्येँ थुकथं दु: -
• जितः यःम्ह मय्जु ...
• लिथ्वःगु मतिना ...
• तापालय् ...
• निफ्वः स्वां ...
• चेतनमाला ...
• छतिकि...
• दुघाः जुलुस ...
• जनता बुइमखु ...
• मतिनाया चिखि...
• गुजे मालाकारया म्ये मुना ...