न्हूदँ समारोह समितिं प्रम केपी ओली नापलात
नेपाल संवत न्हूदँ राष्ट्रिय समारोह समिति ११३६ या नायः डा. महेशमान श्रेष्ठया नेतृत्वय् थौं सुथय् प्रधानमन्त्री निवास बालुवाटारय् प्रधानमन्त्री केपी शर्मा ओलीयात नापलानादीगु दु ।
उगु नापलायेगु ज्याझ्वलय् समारोह समितिपाखें समितिया नायः डा. श्रेष्ठं न्हूदँया लसताय जुइगु सभाय् मूपाहाँकथं झायेत इनाप पौ लःल्हानादीगु खः । अथेहे, नेपाल संवतया महत्व व गरिमायात कयाः थुगु संवत् राष्ट्रिय संवत धकाः घोषणा यायेधुंकाः थुगु संवतयात सम्मान यायेमाःगु व नेपाल संवतयात नेपाःया मौलिक संवतकथं छ्यलाबुलाय् हयेमाःगु लिसें नेपाल संवत प्रतिष्ठान नीस्वनेमाःगु, नेपाल संवतयात नेपाःया नोटय् अंकित यायेमाःगु, नेपाल संवतया प्रवद्र्धक शंखधर साख्वाःया जीवनीयात कयाः पाठ्यक्रमय् दुथ्याकेमाःगु व येँय् शंखधर साख्वाःया झ्वाता पलिस्था यायेमाःगुलिसें च्यागू बुँदे ध्यानाकर्षण पौ नं लःल्हाःगु खः ।
समारोह समितिं ब्यूगु ब्वनापौ व ध्यानाकर्षण पौ लःल्हानाकायेधुंकाः प्रम ओलीं नेपालसंवतया महत्व व गरिमा न्ह्याबलें दयाच्वनीगु विचाः प्वंकूसें नेपाःया जात्रा पर्व व संस्कृति धर्म थ्व फुक्क नेपाल संवत कथं हे न्ह्यानाच्वंगु विचाः तयादीगु खः लिसें वय्कलं देसया वर्तमान राजनीतियात कयाः थःगु विचाः तयेगु झ्वलय् थ्व इलय् नेपाली जनतां दुःख सीमालाःच्वंगु व थ्व दुःख विना कारण जूगु थःपिन्सं सुयातं हे स्यंकेत मस्वःसां थीथी हुनिं दुःख जुयाच्वंगु खँ तयादिसें थ्व इलय् नेपाली जनतां यानाच्वंगु धैर्य व ग्वाहालियात सुभाय् देछानादीगु खः ।
समारोह समितिपाखें प्रम नापलायेगु ज्याझ्वलय् समारोह समितिया सल्लाहकारलिसें सांसद लक्ष्मण राजवंशी, सल्लाहकारपिं लक्ष्मीदास मानन्धर, डा. त्रिरत्न मानन्धर, डा. रत्नकमल वैद्य, सुरेन्द्रवीर मालाकारलिसें न्हूदँ समारोह समितिया सकल दुजःपिं उपस्थित जूगु खः ।
अथेहे, उगु नापलायेगु ज्याझ्वलय् नेकपा एमालेया केन्द्रीय ज्याकुथि सचिव कृष्णगोपाल श्रेष्ठ, सांसद रामवीर मानन्धरलिसें एमाले नेवाः कार्यकर्तापिं उपस्थित जूगु खः ।
