ई नि ब्यःया खँ । तर ई ब्यःया खँ ।
खँ धइगु खँ हे जक खः । अथेसां थ्वँ थें ।
छकः थःगु चर्चा पत्रपत्रिकां याकेत बःचा धंगु पत्रकार सम्मेलन यानाः कुमारीया परम्परा विरुद्ध आन्दोलन याये धाम्ह छम्ह मय्जु कुमारीया तुतिइ लाःवःगु दु । थ्व नं कुमारीया हे लीला धाइ जुइ धाइपिन्सं ।
दक्वं दक्वं थासय् मिजं मिसाया अधिकार समान धाइम्ह व । तर वं मेमेथाय् धाःसां थःगु पार्टीइ धाःसा गबलें धाःगु दइमखु । अपाय्जि ततःधंगु भ्वय् नयेगु हैसियत दुम्हस्यां यदि धाःगु जूसा उमिगु पार्टीइ हे अपाय्जि लैंगिक असमानताया ल्वय् प्यप्यपुनाच्वनी ला?
धाःगु जूसा बांलाः तर झीसं छु खनाच्वना ले धायेबय् अन नं छम्ह मिजंया हे सतिक्क च्वने मसयेकं अन नं सुं मिसाया जय मजुइगु लानाच्वन धइगु क्यं । कि मिजंया लिउलिउ जुइसयेकेमाः, कि ध्यबाया । उकिं ला उकुन्हु २६कारेडया हिरोइनयात कारबाही हे मयाः । सुम्क मुलय् तयातल । गज्याःगु थाुक धया । याःसां यात धाइ, मयाःसां मयाः धाइ ।
आः वइ कुमारीया खँ । वय्कः कमनिष्ठ अथे धइगु निष्ठा म्हो दुम्ह धाःगु । अथे धयापिन्सं द्यः मानेयाइमखु धाःगु न्यनातयागु । उमिगु म्येय् हे अथे धाइ हँ । तर वं पाःफःबलय् धाःसा द्यःया नामय् नल धाल । धायेबलय् कि वयाके द्यःभक्ति अप्वयावःगु जुइमाल, कि वयाके निष्ठा अप्वयावःगु जुइमाल । न्ह्यागुसां प्यातुलपितुल मदुथाय् न्ह्यागु अप्वयावःसां बांलाःगु हे खः जुल ।
का, आः व कुमारीया परम्परा हे हांनिसें लिनाछ्वये धाःम्ह आः न्हापायाम्ह राष्टपतिथें हथाय् चाचां हे कुमारी भागियाः मवंसां आकिवं इन्द्रजात्रा बलय् ला मवँसें गाइ ला? उमिगु धर्म निरपेक्षतां नं सनातनया रक्षा याये ला धाःगु हे खः । मि मखु?
स्वये हे माली का हला? निष्ठाया खँ, उखे निष्ठा ल्यंकूसा थुखे ह्वब्वाइगु, थुखेया बिचाः यासा उखे चय्त जुइगु । आगे वय्कःया ईश्वरया हे मरजि । मखुला छिं ?
News Location:
