जनबहाःद्यः जात्राया निंतिं समारोह समिति नीस्वन

येँ महानगरपालिकाया कार्यकारिणी अधिकृत पूर्णभक्त तण्डुकारया सभापतित्वय् थौं छगू मुँज्याया दथुइ जनबहाःद्यःया गुरुजु नीलकाली शाक्यया संयोजकत्वय् ४३ म्ह दुजः दुगु जनबहाःद्यः रथयात्रा समारोह समिति - ११३५ नीस्वंगु दु ।

थ्वहे वइगु चिल्लाथ्व अष्टमि (चैत्र १३ गते) निसें न्ह्याइगु जनबहाःद्यः जात्रा तःजिक न्यायेकेगु निंतिं जूगु उगु भेलाय् पूर्वजनप्रतिनिधि, जात्रा जुइगु रुटय् लाःगु थीथी खलःपुचःया प्रतिनिधिपिं, येँँ महानगरपालिकाया थीथी विभागया प्रमुखपिं उपस्थित जूगु खःसा मूपाहाँ कथं जिल्ला प्रशासन कार्यालयया सहायक प्रमुख सुरेन्द्र पौडेल झायादीगु खः । अथेहे सभासद् ध्यानगोविन्द रञ्जित, दलीय प्रतिनिधि भगवान शाक्य उपस्थित जुयादीगु खः ।

ज्याझ्वलय् जनबहाःद्यः जात्राया निंतिं सरोकारपक्षपिसं जात्रा ताःलाकेगु निंतिं थःथःगुपाखें ग्वाहालि यायेगु प्रतिबद्धता प्वंकादीगु खः । मूपाहाँ सहायक जिल्ला अधिकारी पौडेलं देसय् राजनीतिक परिवर्तन व सत्ताया परिवर्तन न्ह्याक्व हे उखेथुखे जूसां नेपाःया संस्कृति व परम्परा वहे जुयाच्वनीगु खँ तयादिसें नेपाःयात म्हसीका बियाच्वंगु थुकथंया संस्कृति परम्परायात ल्यंका तयेगु निंतिं जनस्तरपाखें ज्या यानावयाच्वंगु खं थः उत्साहित जूगु व थःपिनिगु ज्याकूपाखें थुगु जात्राया निंतिं गुकथं फु उकथं ग्वाहालि यायेगु बचं बियादीगु खः ।

लसकुस न्वचु जनबहाःद्यःया गुरुजु नीलकाजी शाक्यं बियादीगु खःसा वय्कलं जनबहाःद्यःया जात्रा सारा नेपाःमिपिनि जात्रा जूगुलिं सकसितं ग्वाहालि यायेत इनाप यानादीगु खः । सभापतिया थासं न्ववासें येँ महानगरपालिकाया कार्यकारी अधिकृत तण्डुकारं जनबहाःद्यःया जात्राया निंतिं आर्थिक ग्वाहालि अप्वयेका बीगु, जात्रा ज्वःछि सरसफाई, सतक मतया व्यवस्था यायेगु निंतिं उगु हे ज्याझ्वलय् सम्बन्धित विभागयात निर्देशनतकं बियादीगु खः ।
जागरण मञ्चया नायः सुजीव बज्राचार्यं समन्वय यानादीगु ज्याझ्वलय् पूर्वजनप्रतिनिधि पवित्र बज्राचार्य, इन्द्रजात्रा व्यवस्थापन समितिया नायः गौतम शाक्य, मरुत्वाः पुचःया दुजः बसन्त श्रेष्ठयालिसें थीथी संघसंस्थाया दुजःपिसं जात्रायात बांलाकेगु निंतिं थीथीकथंया सुझाव बियादीगु खः ।