शनिवाः नेपालभाषा एकेदमिया पुनर्गठन याइगु
नेपालभाषा एकेदमिया पुनर्गठन थ्वहे वइगु चिल्लागा अष्टमि (फागुन ३० गते) शनिवाः याइगु जूगु दु । एकेदमिया केन्द्रीय ज्याकू किपूया न्यामासिमाय् जुइगु साधारणसभां एकेदमिया पदाधिकारीतय् न्हूधाः याइगु खँ धाःगु दु ।
उगु पुनर्गठनं एकेदमिया न्हूम्ह चान्सलर, भाइस चान्सलर, सदस्य सचिव नापं खाली जुयाच्वंगु झिंखुम्ह दुजःत नं ल्यइगु जूगु दु । न्हूधाःपाखें चान्सलरय् चित्तरंजन नेपाली, भाइस चान्सलरय् यज्ञरत्न धाख्वाः व सदस्य सचिवय् मल्ल के. सुन्दर वइगु कथं र्चचा जुयाच्वंगु दु । अथेहे आःया चान्सलर नापं संस्कृतिविद सत्यमोहन जोशी एकेदमिइ संरक्षक कथं च्वनादीगु सम्भावना दु ।
नीस्वदँ न्ह्यः नीस्वंगु एकेदमिया न्हापांम्ह चान्सलर बैकुण्ठ प्रसाद लाकौल जुयादीगु खःसा वयां लिपा सत्यमोहन जोशी चान्सलर जुयादीगु खः ।
