कांग्रेस–मधेशवादी दलतय् बैठक न्यागू जिल्लाय् केन्द्रीत
सत्ताया नेतृत्व यानाच्वंगु नेपाली कांग्रेस व विपक्षी मोर्चाया छगू घटक मधेशवादी दलत दथुइ शुक्रवाः संघीयताया विषयलय् केन्द्रीत जुया सहलह जुल । प्रधानमन्त्री निवास बालुवाटारय् जूगु निगू पक्ष दथुइया सहलह विशेष यानाः सूदुरपश्चिमया कौलाली व कञ्चनपुर नापं पूर्वया झापा, मोरङ व सुनसरी जिल्लाया विषयलय् केन्द्रीत जूगु खः ।
उगु इलय् मधेशवादी दलतय्सं मधेशय् निगू प्रदेश दयेकेमाःगु धासें विवादित न्यागूलिं जिल्ला मधेशय् तयेमाःगु खँ न्ह्यथंगु खः । सूदुरया निगू जिल्ला थारुवान मधेश व पूर्वया स्वंगू जिल्ला मधेशय् जुइमाःगु बिचाः प्वंकूगु खः ।
सहलह लिपा कांग्रेस प्रवक्ता दिलेन्द्रप्रसाद बदूं सहलह संघीयताया विषयलय् केन्द्रीत जूगु व मधेशवादी दलतय्सं मधेशय् निगू प्रदेश दयेकेमाःगु बिचाः प्वंकूगु धयादिल । अथेहे सद्भावना पार्टीया अध्यक्ष राजेन्द्र महत्तों कांग्रेसं थःपिनिगु खँ प्रेमपूर्वक न्यंगु व आः उकीयात कार्यान्वयन नं यायेमाःगु धयादिल ।
सहलहलय् कांग्रेसया पाखें प्रधानमन्त्री नापं कांग्रेस सभापति सुशील कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, महामन्त्री कृष्णप्रसाद सिटौला लगायतया ब्वति दुगु खःसा मधेशी दलतपाखें मधेशी जनअधिकार फोरम लोकतान्त्रिकया अध्यक्ष विजय कुमार गच्छदार, तराई मधेश लोकतान्त्रिक पार्टीया अध्यक्ष महन्त ठाकुर, सद्भावनाया अध्यक्ष महत्तो लगायतया ब्वति दुगु खः ।
किपा : प्रधानमन्त्री सचिवालय
