निगू तःधंगु वामपन्थी दलत दथुइ सहलह
निगू तःधंगु वामपन्थी दलत नेकपा एमाले व एकीकृत माओवादी दथुइ शुक्रवाः संविधान निर्माणया विवादित विषयलय् सहलह जूगु दु ।
एमाले अध्यक्ष केपी ओलीया बालकोटय् च्वंगु छेँय् जूगु सहलह संघीयता व न्यायप्रणालीया विषयलय् सहलह जूगु खः । निगूलिं विषयलय् सहलह जूसां ठोस सहमति जुइमफुगु खँ माओवादीया महासचिव कृष्णबहादुर महरां कनादिल ।
छुं ई न्ह्यः निसें छगू दलं मेगू दलयात द्वपं बिइगुलि केन्द्रीत जुयाच्वंगु निगू दलया दथुइ थःपिनिगु सम्बन्धयात सुधार यायेगु पाखें नं खँ जूगु खः ।
उगु सहलहलय् एमालेपाखें अध्यक्ष ओली, उपप्रधान मन्त्री नापं उपाध्यक्ष बामदेव गौतम, उपाध्यक्ष विद्या भण्डारी, महासचिव इश्वर पोखरेल व प्रमुख सचेतक अग्नि खरेलया ब्वति दुगु खः । माओवादीयापाखें अध्यक्ष प्रचण्ड, वरिष्ठ नेता डा. बाबुराम भट्टराई, उपाध्यक्ष नारायणकाजि श्रेष्ठ, महासचिव महरा व नेता टोपबहादुर रायमाझीया ब्वति दुगु खः ।
