संघर्षया रुपय् हन नेवाः एकता दिवस
नेवाःतय्सं न्याक्वःगु नेवाः एकता दिवसं संघर्षया कथं हंगु दु । निक्वः संविधानसभां संविधान जारी याइगु ई लच्छि जक ल्यँ दुगु इलय् नेवाः स्वयत्त राज्य प्राप्तिया निंतिं थुगु दिं संघर्षया कथं हंगु खः ।
नेवाः स्वायत्त राज्य दुथ्याःगु न्हूगु संविधान जारी यायेमाःगु धासें नेवाःतय्सं थुगुसी सभा स्वयां र्याली पिकाया जनदबाव बिइगु ज्या यात । नेवाः स्वायत्त राज्य मंकाः संघर्ष समितिया आव्हानय् बसन्तपुली न्ह्याःगु र्याली नरदेवी, क्षेत्रपाटी, थँबही, ज्याठा, जमः, रानीपोखरी, रत्नपार्क, असं, वंघः जुयाः हान बसन्तपुली क्वाःगु खः ।
र्याली स्वयां न्ह्यः जूगु सभाय् मू पाहाँ आदिवासी जनजाति आन्दोलन नेपालया नायः पद्मरत्न तुलाधरं नेवाः राज्य सहित समावेशीता, समानता व मानवअधिकारया निंतिं म्हगसः खंकेत इनाप यानादिल । वय्कलं झीसं छुं नं खँ प्राप्त याये न्ह्यः म्हगस खंकेमाःगु धयादिसें पहिचानया आन्दोलनया निंतिं व्यापक दबाव सहित संघर्ष यायेमाःगु धयादिल ।
संघर्ष समितिया नायः मनोज नेवाः खड्कीया सभापतित्वय् जूगु सभाय् सचिवालय कजि मल्ल के. सुन्दरं सत्तारुढ दलतय् न्हय्गू प्रदेशया प्रस्ताव धोका जूगु व नेवाःतय्त अल्पमतय् लाकीगु खेल जूगुलिं छुं नं कथं उकीयात स्वीकार यायेमफइगु धयादिल ।
अथेहे र्याली लिपा जूगु सभाय् ज्यापु समाज यलया नायः मंगल महर्जन व मिसा नेतृ शोभा महर्जनं नं सम्बोधन यानादीगु खः । र्यालीइ ब्वति कायेत येँ, किपू, यल, ख्वप, सक्वः आदि थीथी लागां द्वलंद्व मनूतय् ब्वति दुगु खः । र्यालीइ उलेख्य रुपय् मिसातय् नं ब्वति दुगु खः ।
खुदँ न्ह्यः येँया दशरथ रंगशालाय् जनसतरं नेवाः स्वायत्त राज्य घोषणा जूगु न्हि कथं पोहेलथ्व नवमि कुन्हु नेवाः एकता दिवस कथं हनावयाच्वंगु खः । थ्वस्वयां न्ह्यः यलया पुलच्वः, किपू व येँय् नेवाः एकता दिवस तःजिक हंगु खः ।
