नेवाः एकता दिवसया निंतिं त्वाः भेला
थुगुसीया नेवाः एकता दिवस तःजिक ताःलाकेगु तयारी कथं बिहीवाः न्यागू ज्याझ्वः जुल । बिहीवाः सुथय् येँया ध्वाखाबहालय् २७, २८ व ३० वडाया मुँज्या जुल । मुँज्याय् नेवाः एकता दिवस तयारी समिति निर्णय कार्यान्वयन समितिया दुजः सत्यनारायण डंगोल, कलाकार पवित्र कसाः, जनगायक भृगुराम श्रेष्ठ, पुर्व ३० वडाध्यक्ष चिनियामान बज्राचार्यलिसें नेवाः जागरण मञ्चया नायः सुजीव बज्राचार्य, नेवाः स्वायत्त राज्य मंकाः संघर्ष समितिया नायः मनोज नेवाः खड्गी व २७ वडापाखें अनाररत्न बज्राचार्यं थःगु नुगः खँ तःगु खः ।
अथे हे १६ वडाया भेला येँया नयाँ बजारय् जुल । भेलाय् नेवाः स्वायत्त राज्य मंकाः संघर्ष समिति सचिवालय कजी मल्ल के सुन्दरं पुष १५ गते सकसित बसन्तपुरय् मुनेत आव्हान यानादिल । ज्याझ्वलय् सत्यनारायण डंगोल, सुजीव बज्राचार्यलिसें ज्यापु महागुथिया नायः राजभाइ जकःमि, मनोज नेवाः खड्गीं थःगु नुगः खँ तयादिल ।
थँहितिइ १७ वडा भेलाय् सुजीव बज्राचार्य, सत्यनारायण डंगोल व मनोज नेवाः खड्गीं नेवाः एकता दिवसया महत्वया बारे नवानादिल । २४ वडा मिसा भेला येँया वतु त्वालय् क्वचाल । ज्याझ्वलय् संघर्ष समितिया दुजः उमेश स्थापितलिसें मेमेपिंसं नं खँ तयादीगु खः । थिमि भेला ज्याझ्वः नं थौं हे थिमिइ क्वचाल । ज्याझ्वलय् राजभाइ जकःमिजुं नेवाः पहिचानया नितिं नेवाः एकता दिवस कुन्हु सकल नेवाःत छधी जुइत आव्हान यानादिल ।
अथे हे कन्हय् नं थी थी ज्याझ्वःत जुइत्यंगु दु । कन्हय् बुंगय् बुंग भेला, सक्व भेला जुइत्यंगु दु सा देय् भ्वय् छेँ, भिंद्यः त्वालय् चियापान ज्याझ्वःलिसें तख्ति नीलबाराहि कालिमाटिइ बृहत पहिचान पक्षधर चियापान ज्याझ्वः जुइत्यंगु दु ।
