नेवाः एकता दिवस हनेत तयारी समिति स्वन
नेवाः स्वायत्त राज्य मंकाः संघर्ष समितिं थ्वहे वइगु पोहेंलाथ्वः नवमि (पुस १५ गते) येँय् तःजिक पहिचानसहितया संघीयता पलिस्थाया निंतिं संघर्षया रुपय् नेवाः एकता दिवस हनीगु जूगु दु ।
उगु दिवस हनेगु निंतिं म्हिगः नेपाः ब्याङ्क्वेटय् भौगोलिक, व्यावसायिक व क्षेत्रगतरुपं छगू भेलाया आयोजना यासें ७४ सदस्य दुगु नेवाः एकता दिवस तयारी समिति नीस्वंगु दु । उगु समितिइ हनेबहःपिं नेवाः न्ह्यलुवापिं भाजु लक्ष्मीदास मानन्धर, भृगुराम श्रेष्ठ, इ. मोहनकृष्ण डंगोल, अथेहे दलीय सदस्यरुपं नेपाली कांग्रेसपाखें वीरेन्द्रभक्त श्रेष्ठ, एमालेपाखें जीवनराम श्रेष्ठ, एकीकृत माओवादीपाखें हिसिला यमी, नेकपा माओवादीपाखें देवेन्द्र श्रेष्ठ, संघीय समाजवादी पार्टीपाखें डा. मंगलसिद्धि मानन्धर, नेपाः राष्ट्रिय पार्टीपाखें डा. विजय सैंजु च्वनादीगु दु ।
अथेहे यलपाखें ज्यापु समाज, बौद्ध विहार संघया प्रतिनिधि व अमीर शाक्य, शाक्य सुरेन च्वनादीगु दुसा ख्वपपाखें त्रिरत्न शाक्य, प्रदीप शाक्य, सत्यलाल मूल च्वनादीगु दु । अथेहे किपूपाखें कृष्णहरी महर्जन, दिलबहादुर महर्जन, ज्ञानकाजी महर्जन च्वनादीगु दुसा थिमिपाखें कृष्णबहादुर घःजु, थक्वाःपाखें देव महर्जन, भ्वँतपाखें सिद्धिबहादुर कर्माचार्य, विश्वनाथ ताम्राकार, सक्वपाखें सूर्यनारायण श्रेष्ठ, टिष्तुङपाखें विनोद महर्जन, टोखापाखें श्रीकृष्ण मानन्धर, इचंगुपाखें अजित पुतुवार, खोनापाखें शरणगोपाल डंगोल, बुंगपाखें सञ्जय खड्गी, हिरा कर्माचार्य च्वनादीगु दु ।
अथेहे कर्मचारीख्यःपाखें जगत पात्या, जनवादी संस्कृति पुचःपाखें वीरप्रसाद भन्सारी, शिक्षकपाखें विजयरत्न बज्राचार्य, सञ्चारपाखें नेवाः राष्ट्रिय पत्रकार दबूया प्रतिनिधि व विराज राजोपाध्याय, नेवाः कलाकारपाखें विजयरत्न असंबरे, पवित्र कसाः, राजीव राजोपाध्याय, मिसापाखें शोभा बज्राचार्य, शोभा महर्जन, शान्ता महर्जन च्वनादीगु दुसा कासापाखें राजेश्वर स्थापित व पूर्वजनप्रतिनिधिपाखें पवित्र बज्राचार्य च्वनादीगु दु ।
अथेहे स्वयम्सेवक परिचालनया निंतिं सूर्यबहादुर श्रेष्ठ, रोजिन स्थापित, रवि महर्जन च्वनादीगु दु ।
येँपाखें संघर्ष समितिं नीस्वनातःगु येँया १२ गू वडाया छम्ह छम्ह प्रतिनिधि समितिइ दुथ्याकूगु दु । थुगु तयारी समिति न्ह्याकेगु निंतिं संघर्ष समितिं समितिया नायः गजेन्द्र मानन्धर, सुजीव बज्राचार्य, सत्यनारायण डंगोल, मनोज नेवाः, उमेश स्थापित, सुरेन्द्र महर्जन दुथ्याःगु निर्णय परिचालन समिति नीस्वंगु दु ।
थुगु समितिया मुँज्या थौंहे च्वनेत्यंगु दुसा उगु मुँज्यां नेवाः एकता दिवसया निंतिं जनस्तरया थीथी ज्याझ्वः तयारी याइगु जूगु दु ।
