सिक्किम सरकारया प्रतिनिधि मण्डल येँय्

जःलाखःला देय् भारतया सिक्किम सरकारया छगू प्रतिनिधि मण्डल प्यन्हुया औपचारिक भ्रमणया लागि येँय् थ्यंगु दु । सिक्किम राज्यय् नकतिनि क्वचाःगु प्रान्तिय चुनावय् नेवाःत नं त्याःगुलिं नेपाःया नेवाःतय्पाखें वय्कपिंत बधाइ बीत नेपाः सःतूगु खः । संस्कृतिविद् भाजु गणेशराम लाछिया व्यवस्थापनय् वय्कःपिं येँय् झायादीगु खः ।

शुक्रवाः जूगु पत्रकार नापलायेज्याय् जानकारी ब्यूकथं सिक्किमया संसदय् निम्ह नेवाःत त्याःगु खः । सिक्किम डेमोक्राटिक फ्रन्टपाखें भाजु विक्रम प्रधान व सिक्किम क्रान्तिकारी मोर्चापाखें भाजु श्याम प्रधान त्याःगु खः । भाजु विक्रम प्रधानया पार्टी सिक्किम डेमोक्राटिक फ्रन्ट सत्तापक्ष खःसा भाजु श्याम प्रधानया सिक्किम क्रान्तिकारी मोर्चा विपक्षी खः । भाजु विक्रम प्रधान सिक्किम डेमोक्राटिक फ्रन्टपाखें मूख्य सचेतक नं खः । वय्कः भारतन्यंकंया हे दक्कले क्वकालिम्ह मुख्य सचेतक जूगु खः । वय्कःपिंलिसें कंग्रेस आई सिक्किम प्रान्तया उपाध्याक्ष भाजु रुद्र नरसिंह शाक्य सहित २० म्हेसिया टोलिया नेतृत्व यासें सिक्किम नेवाः गुथिया नायः भाजु रोहित प्रधान बिहिवाः हे येँय् थ्यंगु खः ।

वय्कःपिं थीथी राजनीतिक पृष्ठभूमियापिं खःसा नेपाः भ्रमण मुक्कं नेवाःया नातां जूगु नं जानकारी बियादिल । राजनीतिक मतभेद दःसां नेवाःया मुद्दाय् सकलें छप्पं व छधी जुइमाःगु व आःतकनं जुयाच्वनागु जानकारी बियादिल । थुकथं थीथी न्ह्यसःया लिसः बियादिसें सिक्किम सरकारं नेवाःतय् भाषा व संस्कृतिया खँय् माःगु ग्वहालि यानाच्वंगु जानकारी बियादिसें कुमारी जात्रा खुन्हु सार्वजनिक विदा समेत घोषणा यानातःगु जानकारी बियादिल ।

वय्कःपिंत शुक्रवाः हे नेवाः देय् दबुलिं छगू ज्याझ्वयासें हनादीगु दुसा ज्यापु दिवस (यःमरि पुन्हि) खुन्हु ज्यापु संस्कृति विकास कोषया ग्वसालय् येँय्या बसन्तपुलिइ जुइगु ज्याझ्वलय् सम्माननीय प्रधानमन्त्री सुशिल कोइरालां हनीगु जूगु दु ।

वय्कःपिं थिंलागा दुतिया (8th Dec.,2014) खुन्हु स्वदेश लिहाँ झाइगु ज्याझ्व: दयेकाःतःगु दु ।