लावती व वय्कःया काय् राप्रपा नेपालपाखें निष्कासित

येँ/ राप्रपा नेपालं पद्मसुन्दर लावती व वय्कःया काय् सगुन लावतीयात पार्टीपाखें निष्कासित याःगु दु ।
राप्रपा नेपाल केन्द्रीय कार्य सम्पादन समितिया बैठकं थौं थज्याःगु निर्णय याःगु खः । पार्टी नायः कमल थापाया नायःसुइ च्वंगु बैठकं पार्टी व पार्टी नेतृत्वप्रति भ्रम न्यंकेगु, पार्टीया नां व ध्वाँय्या दुरुपयोग यानाः पार्टीया नामं समानान्तर भेला यायेगु, ज्याकू चायेकेगु व सांगठनिक अभ्यास यायेगुलगायत पार्टीइ साधारण सदस्यता नापं मदइकथं निष्कासन यायेधुंकूपिं मनूतलिसे अप्राकृतिक साँठगाँठ याना पार्टीया महाधिवेशनया मार्ग निर्देश अःखः वनेगु, पार्टीपाखें माग जूगु स्पष्टीकरण नापं न्ह्यःमब्वसे ब्यागलं राजनीतिक दल चायेकेगु लिसेया सार्वजनिक अभिव्यक्ति बियाः अराजनीतिक व पार्टी हित अःखःया क्रियाकलापय् प्रत्यक्ष संलग्नता खनेदुगु न्ह्यःथना पद्मसुन्दर लावती व पार्टीया केन्द्रीय दुजः सगुनसुन्दर लावतीयात निश्कासन याःगु खः ।
अनुशासन समितिया सिफारिसय् पार्टीया विधानकथं साधारण दुजः नापं मदइकथं निम्हसित पार्टीपाखें निष्कासन यायेगु निर्णय जूगु प्रवक्ता विष्णु भट्टराईं जानकारी बियादिल ।
नापनापं सगुन लावतीं राष्ट्रिय प्रजातान्त्रिक युवक संगठन नेपालया सभापति पदपाखें पदमुक्त जुइधुंकाः नं पदया दुरुपयोग यानाः संगठनया खातापाखें अनधिकृत रूपं धेबा लिकयाः लखौं तकाया आर्थिक अनियमितता नापं याःगु खनेदुगुलिं उगु धेबा नापं याकनं लित बीकेगु बैठकं निर्णय याःगु भट्टराईं विज्ञप्तिपाखें जानकारी ब्यूगु खः ।