आखिरय् वया तज्यात ड्यास माओवादी

येँ/ दच्छि न्ह्यःनिसें नेकपा–माओवादी पार्टीदुनेया अन्तर संघर्षया रूप आखिरय् वया विभाजन जुयाः त्वःतूगु दु । नेकपा–माओवादीया छ्याञ्जे नेत्रविक्रम चन्द ‘विप्लव’ पुचलं थौं नायः मोहन वैद्य ‘किरण’यात पारपाचुकेया पौ लःल्हाना थःपिं ब्यागलं ढंगं न्ह्यःने वनेगु औपचारिक घोषणा याःगु खः ।

थ्व इलय् वैद्यया बैठक बुद्धनगरय् च्वनाच्वंगु दुसा विप्लव पुचःया ब्यागलं बैठक अनामनगरय् नकतिनि जक क्वचाःगु दु । “पार्टीदुनेया निगू लाइन संघर्षय् गुकथं न्ह्यःने न्ह्यायेगु धइगु खँय् निगू मत जुल । न्हापां ब्यागलं भेलाबारे कारबाही मयायेगु धाःसां नं हाकनं किरणं दस्तावेजय् कारबाही यायेमा धकाः हयादिल । अथेहे जुयाः थौंनिसें वय्कःपिंलिसे पारपाचुके धकाः लिखित प्रस्ताव हे लःल्हानाबिया ।” विप्पल पक्षधर केन्द्रीय दुजः गुणराज लोहनीं जानकारी बियादिल ।