थापाया दाबी राप्रपा नेपाल न्हापांगु शक्तिया रूपय् वइगु
झापा/ राष्ट्रिय प्रजातन्त्र पार्टी नेपालया नायः कमल थापां माघ ८ गते संविधान जारी मजूसा अनंलिपा राप्रपा नेपाल न्हापांगु शक्तिया रूपय् वइगु दाबी यानादीगु दु । आः दयेकीगु न्हूगु संविधानय् सनातन हिन्दु राष्ट्र कायम याकेगु उद्देश्यं जनमत तयार यायेत मेची अञ्चलया कार्यकर्ता नापलायेगु नितिं झापा झायादीम्ह नायः थापां थौं बिर्तामोडय् पत्रकार सम्मेलनय् उगु दाबी यानादीगु खः ।
प्रमुख धयातःगु स्वंगू दल सत्ता केन्द्रित फोहोरी कासाय् तक्यंगु हुनिं माघ ८ गते संविधान जारी जुइगु खँय् थः विश्वस्त मदुगु धयादिसें वय्कलं राप्रपा नेपालं ल्ह्वंगु मूलभूत विषय दुमथ्याःगु संविधान जारी जूसा नेपाःमि जनतां अस्वीकार याइगु बिचाः प्वंकादीगु दु ।
नेपाली कांग्रेस व नेकपा (माले) ल्याःया गणितीय दम्भ लिसे एमाओवादी व मधेशवादी दल पराजयया पीडां निषेधया राजनीतिइ वंगु द्वपं ब्यूसें नायः थापां इलय् हे संविधान जारी यायेत संविधानसभाया पूर्ण बैठक याकनं सःतेमाःगु माग यानादिल ।
छगू ब्यागलं प्रसङ्गय् वय्कलं थःत नायःपाखें राजीनामा बीत नीछन्हुया अल्टिमेटम बियादीम्ह लावती पुचःयात इच्छा दुसा मेगु पार्टी चायेकाः क्यनेत ख्याच्वः नापं बियादीगु दु ।
