हिन्दूराष्ट्रया खँ आ: छाय् ?

२०६३ जेठं ‘प्रतिनिधि सभाया घोषणा – २०६३’ जारी जुया: नेपा:यात धर्मनिरपेक्ष राष्ट्र घोषणा या:बलय् गनं नं विरोध जुलुस पिमदं । तर आ: धा:सा हिन्दू राष्ट्रया नामय् अनसन च्वनेगु निसें रोष्ट्रम घेरे यायेगु ज्या जुयाच्वंगु दु । संविधान दयेकेगु ज्याय् फैसला यायेमा:गु इलय् हे वया: छाय् थुकथं जुल ले ? स्पष्ट खनेदुगु खँ छु ख: ले धा:सा थ्व संघीयता विरोधीतय्गु बार्गेनिङ जक ख: । वंगु संविधानसभाया चुनावय् हे ‘रुगा’ व ‘सूगा’या रुपय् थ्व खनेदुगु ख: । छु गथे जुया: माओवादीत माने मजुल धा:सा थनया संसदवादी दलत प्रतिगामी एजेण्डालिसे नं सत्तिना वनेफु धइगु खँया संकेत ख: ।
तर वसिकं नं ग्यानापुगु खँ ला छु धायेबलय् संविधानसभाया बनोट नं छुं भचा उकथंया जूवंगु खनेदु ।
संविधानसभाय् कांग्रेसया १९६ व एमालेया १७५ सीट तयेबलय् ३७१ सीट जूवनी । स्वब्वय् निब्व कायेत ४०१ मत माल । धायेबलय् ३० मत मगा:गु खनेदत । थुकिइ राप्रपा नेपालया २५ सिटं त:धंगु भूमिका म्हितेफु । इमिगु भोट कायेत ‘हिन्दू राष्ट्र’ माने यायेमा:गु जुल । उकिं एमाओवादीनाप सहमति मजुल धा:सा ‘हिन्दू राष्ट्र’ तया: संविधान जराी या, धका: हाला ख्याना: क्यनेगु ज्या थुकिं यानाच्वंगु ख: ।
छखें सुनां नं छुं फ्वन धा:सा मेपिसं मेगु हे फ्वनाच्वंगु दु धका: मूलम्ह फ््वनीम्ह मनूयात छले यायेगु थ्व छगू राजनीतिक दाउपेच हे ख: । थ्वहे दाउपेच व षडयन्त्र अन्तर्गत हे थ्व हिन्दू राष्ट्रया माग न्ह्य:ने वयाच्वंगु दु ।
रत्नपार्कय् हिन्दू धका: धा:पिनि प्रदर्शन तसकं निरीहकथंया खनेदत । तर उकथं निरीहकथंया प्रदर्शन जूगु जूसां अन प्रहरी हस्तक्षेप हे यायेम्वा:गु हस्तक्षेप यात । छम्ह जोगीयात ज्वना नं यंकल । हानं सदनय् गृहमन्त्री वामदेव गौतकं छुं तां म्वा: थें च्वंक लिस: बिल । वामदेवया लिसलय् साक्षात् महाद्य: थें च्वंक पा ज्वना व:गुलिं ज्वनेमा:गु धका: हचुवां जवाफ ब्यूगु ख:, तर सुयां भावनाय् व चोट लाकीगु ज्या या:गु थ्यंक धायेमछिं । तर राप्रपा नेपालं धा:सा हिन्दूतय्गु भावनाय् चोट लाकीगु ज्या यात धका: तप्यंक द्वपं बिया: मनूत ग्वाकल । थ्व स्वयेबलय् थ्व ज्या नियोजित रुपं हे जुयाच्वंगु ला मखुला धका: बिचा: यायेमा:गु स्थिति पिहां व:गु दु ।
वास्तवय् थ्व नियोजित पह:या ज्या नं खनेदु । मेखे कांग्रेस दुने खुमबहादुर व एमाले दुने मोदनाथ प्रश्रितं हिन्दू राष्ट्रया पक्षय् हे वकालत यानाजूगु दु । थ्व नं गम्भीर विषय ख: । थुपिं नं मथूपिं हे मनूत थ्यंक मखु, स्वार्थवश हे इमिसं थ्व खँ ल्हानाच्वंगु खनेदु । थ्व गम्भीर विषय खनेदु । थुकिं याना: याकनं हे संविधान जारी मयात धा:सा थन न्ह्याग्गु नं कथंया घटना जुइफु धइगु खँया संकेत नं ब्यूगु दु । छखे एमाओवादी १२ गू बुँदाया सम्झौता व विस्तृत शान्ति सम्झौताया हे आधारय् न्ह्या: वनेमा: धका: धयाच्वंगु दु धा:सा मेखे थुकिया विपरीतया धार खडा याना: वितण्डा सिर्जना यायेगु ज्या जुयाच्वंगु दु । थुकिया सन्देश थ्वहे ख: कि आ: १२ गू बुँदाया सम्झौता व विस्तृत शान्ति सम्झौताया हे नां आपा: कयाच्वन धा:सा दइगु खँ नं गन वं गन वं जुइक फसं पुइकेफु । अथे जूगुलिं याना: याकनं हे कांग्रेस व एमालें धा:थे च्वना: संविधान दयेकेगु ज्याय् ग्वाहालि या ।

More Stories Like this