नेता महरा कञ्चनपुरपाखें ज्वन

कञ्चनपुर/ नेपाल प्रहरीं नेकपा–माओवादी सम्बद्ध अखिल (क्रान्तिकारी)या कञ्चनपुर जिल्ला नायः रामबहादुर महरायात थौं भाँसीपाखें ज्वंगु दु । बन्दया अवज्ञा याःगु न्ह्यःथना सवारी साधनय् तोडफोड याःगु इलय् महरायात ज्वंगु खः ।

बन्दकर्तां भीमदत्त नगरपालिका भाँसीसं च्वंगु राजमार्गय् म. १ ह २४ नम्बरया टेम्पोसं तोडफोड याःगु खः । टेम्पो तोडफोडलिपा भाँसीपाखें महरायात ज्वंगु जिल्ला प्रहरी ज्याकुथिं जानकारी ब्यूगु खः ।

सरकारं भारतलिसे याःगु जलविद्युत विकाससम्बन्धी सम्झौता खारेजीया माग तयाः नेकपा–माओवादीं सुदूरपश्चिम लिसे मध्यपश्चिम क्षेत्रय् बन्दया इनाप याःगु खः ।

बन्दया हुनिं थौं सुथंनिसें हे चीहाकःगु व ताःहाकःगु दूरीया सार्वजनिक सवारीया साधनत सञ्चालनय् वयेमफुगु खःसा शिक्षण संस्था, बजाः व उद्योगत नापं बन्द जूगु खः ।