हिन्दू राष्ट्र घोषणा मयाःसा मू स्वंगू दल समाप्त जुइ : श्रेष्ठ
येँ/ राष्ट्रिय प्रजातन्त्र पार्टी नेपालया सह–महामन्त्री राजाराम श्रेष्ठं अझ नं कांग्रेस, एमाले व एमाओवादीं हिन्दू राष्ट्रया पक्षय् निर्णय यायेमफुत धाःसा आः उपिं हे अन्त्य जुइगु दाबी यानादीगु दु ।
प्राकृतिक विपत्ति पीडित व गरिब जेहेन्दार विद्यार्थीया ग्वाहालिया नितिं अन्तर्राष्ट्रिय नेपाली विद्यार्थी युनियनं ग्वसाः ग्वःगु श्रीमद्भागवत ज्ञान महायज्ञय् न्वंवानादिसें श्रेष्ठं धयादी, ‘गुगु देशय् धर्मनास जुइ, वहे देशय् सर्वनास नं जुइ ।’
येँ महानगरपालिकाया पूर्व मेयर नापं जुयाच्वनादीम्ह श्रेष्ठं हलिमन्यंकया हिन्दूतय्गु नेतृत्व काइगु नेपाः व नेपाःमिया ह्वःताःयात कांग्रेस, एमाले व एमाओवादीलगायत दलतय्सं तंकूगु बिचाः प्वंकादीगु खः ।
राजनीतिक हिउपाःया नामय् कांग्रेस, एमाले व एमाओवादीं देय्या म्हसीका म्यूगु दाबी यानादिसें वय्कलं हिन्दूधर्म राज्य घोषणा याकेत फुक्क नेपाःमिपिं छगू हे थासय् दनेत इनाप नापं यानादीगु खः ।
