संसद् याकनं हे सुचारु जुइ : मन्त्री रिजाल
विराटनगर/ सूचना लिसे सञ्चारमन्त्री डा. मीनेन्द्र रिजालं व्यवस्थापिका–संसद् याकनं हे सुचारु जुइगु धयादीगु दु । एकीकृत नेकपा माओवादीलगायतया विपक्षी दलतय्सं प्यंगू बुँदे सहमति कार्यान्वयनया नितिं सत्तारुढ दलतय्त दवाब बियाः छक्वःपतिकं संसद् बैठक अवरुद्ध यानाः वयाच्वंगु सम्बन्धय् मन्त्री रिजालं संसद् सुचारु यायेत एमाओवादी सकारात्मक जूगु धयादीगु दु ।
विराटनगरय् थौं पत्रकारपिंलिसे खँल्हाबल्हा यानादिसें मन्त्री रिजालं संसद् याकनं हे सुचारु जुइगु धयादिसें वय्कलं धयादी – ‘संसद्या गतिरोध चीकेत एमाओवादी सकारात्मक जूगु दु, याकनं हे संसद् सुचारु जुइ ।’ वय्कलं प्रधानमन्त्री सुशील कोइरालाया अमेरिका भ्रमण न्ह्यः हे एमाओवादी नायः पुष्पकमल दाहाल व प्रधानमन्त्री कोइरालादथुइ जूगु सहलहसं संसद् सुचारु यायेगु विषयसं सहमतिलिक्क थ्यंगु धयादिल ।
वय्कलं सरकार नीस्वने न्ह्यः जूगु प्यंगू बुँदे सहमति कायम यायेत सरकार प्रतिबद्ध दुगु नापं धयादीगु दु । अथेनं एमाओवादीं धयाः वयाच्वंगु उच्चस्तरीय राजनीतिक संयन्त्र नीस्वनेगु अनावश्यक जूगु वय्कःया धापू दु । उच्चस्तरीय राजनीतिक समिति नीस्वनेगु विषययात प्रतिष्ठानया विषय दयेके मज्यूगु प्रष्ट यानादिसें वय्कलं फुक्क खँया निकास जुइगु खःसा सरकार उच्चस्तरीय राजनीतिक संयन्त्र नीस्वनेत नापं तयार दुगु धयादिल ।
