सिक्किमय् नं न्यायेकल इन्द्रजात्रा
नेवाःतय् मौलिक व लोकंह्वाःगु नखः येँयाः जःलाखःला देय् भारतया सिक्किमय् थुगुसीनं झः झः धायेक हंगु दु । सन् २००० निसें न्यायेकाच्वंगु थुगु जात्राय् कुमारीया खः नं सालाः नगर परिक्रमा याःगु खः । तर कुमारी चाहिं येँय् थें मनू मखुसे येँय्या कुमारीयाहे किपायात गाडियात खःचा दयेका उकी तयाः नगर चाःहिइकूगु खः । थुगु ज्याझ्वलय् ब्वति कायेत नेपालं विशिष्ट पाहाँकथं संस्कृतिविद् भाजु गणेशराम लाछि उखे झायादीगु खः ।
कुमारीया खः सालाः जात्रा यायेन्ह्यः कुमारीया विशेष पुजा नं याःगु खः । उगु पुजा ज्याझ्वलय् मूपाहाँ कथं सिक्किम सरकारया कृषि मन्त्री भाजु सोमनाथ पौड्याल झायादीगु खःसा जात्रा क्वचायेवं जूगु थीथी सांस्कृतिक ज्याझ्वलय् पर्यटन मन्त्री भाजु उगेन टी. ग्याल्छो मूपाहाँ कथं झायादीगु खः । सांस्कृतिक ज्याझ्वलय् नेवाः म्ये, चर्या प्याखं लिसें नेवाः लोक प्याखं नं न्ह्यब्वःगु खः ।
सिक्किम नेवाः गुथि, सिन्ताम शाखाया ग्वसालय् जूगु थुगु ज्याझवः थुगुसी सिक्किमया सिन्तामय् न्यायेकूगु खः । थ्व स्वयांन्ह्यः शुरुनिसें २००९ तक नामथाङ्गय्, २०१० निसें २०१३ तक राजधानी ग्यान्तोकय् न्यायेकूगु खः । लुमंकेबहःजू, इन्द्रजात्रा खुन्हु सरकारी विदा समेत बियातःगु दु ।
नेपालं झायादीम्ह संस्कृतिविद् भाजु लाछि व वय्कयाः जहान मय्जु रत्नकेशरी लाछियात अखिल भारतिय नेवार संगठन दार्जिलिङ्गया रिम्बिक, मिरिक व तक्कदाह कचां विशेष ज्याझ्वःया दथुइ हनापौ देछासें हनादीगु खः । सिक्किमकया रंगेली, रिनक व सिन्तामय् नं विशेष ज्याझ्वःया दथुइ हनापौ देछासें हनादीगु खः ।
सिक्किमेली हनेवहःपिंलिसें लाछित्यपुलिं नेवाः तजिलजि, भाषा उत्थानया विषयसलिसें लाछिया परिकल्पनाय् सिक्कमय् दयेकाच्वंगु नेवाः कल्चरल हाउस दयेके सिधयेकेमाःगु खँय् नं दुग्यंक सहलह जूगु खः । झिंन्यान्हुया सिक्किम भ्रमण याना लाछित्यपु शुक्रवाः येँय् लिथ्यने धुंकूगु दु ।
