नेतृ प्रधानयात हाकनं निमोनियाया समस्या
येँ/ वाम लोकतान्त्रिक आन्दोलनया सक्रिय नेतृ साहना प्रधानयात हाकनं निमोनियाया समस्या खनेदुगु दु । वय्कःया उपचारय् संलग्न चिकित्सक डा. संगीतलाल कसजुं नेतृ प्रधानयात छुं दिंनिसें निमोनियाया समस्या खनेदुगु व आः मेमेगु समस्या धाःसा मदुगु धयादिल ।
जलास्यँय् संक्रमण लिसे मस्तिष्कघातया हुनिं म्हंमफयेवं वंगु जेठ २३ गतेनिसें बल्खुसं च्वंगु बयोधा अस्पतालया सघन उपचार कक्षय् नेतृ प्रधानया वासः जुयाच्वंगु दु ।
सुरुइ वय्कःयात भेन्टिलेटरय् तयाः वासः याःगुलिइ आः मस्तिष्कघात व जलास्यँय् खनेदुगु संक्रमणपाखें खतरामुक्त जूगुलिं भेन्टिलेटरपाखें लिकायेधुंकूगु दु ।
डा. कसजुयाकथं स्वास्थ्यय् सुधार जुयाःवःगुलिं छेँय् छ्वयेगु तयारी यानाच्वंगु इलय् वय्कःयात आः निमोनियाया समस्या खनेदुगु व इलय् ब्यलय् भेन्टिलेटरय् नापं तयेमाःगु जूगुलिं छेँय् मछ्वःगु खः । स्वदँ न्ह्यःनिसें म्हंमफयेका च्वनादीम्ह च्यय्च्यादँ (८८) या प्रधान गुला न्ह्यःनिसें न्वंवाये मफुगु अवस्था दु ।
