सत्तापक्षया हुनि इलय् संविधान तयार जुइमखु : शर्मा
प्यंगू बुँदे सहमति कार्यान्वयन मजूत्तले सदन न्ह्याकेमबीगु
विराटनगर/ एकीकृत नेकपा माओवादीया प्रवक्ता दिनानाथ शर्मां सत्तारुढ दलतय्सं हे माघ ८ य् संविधान जारी यायेत तयार मजूगु द्वपं बियादीगु दु ।
विराटनगर विमानस्थलय् थौं सञ्चारकःमिपिंलिसे खँल्हाबल्हा यानादिसें शर्मां कांग्रेस–एमालेया हे हुनिं क्वःछ्यूगु इलय् संविधान जारी जुइमफइगु धयादीगु दु ।
साशकीय स्वरूप व राज्य पुनर्संरचनाया विषयसं सहमति चूलाकेगु कुतः थःपिंसं याःसां नं सत्तापक्ष सहलहया नितिं नापं तयार मजुइगु यानाच्वंगु वय्कःया धापू खः ।
सत्तारुढ दलया जिम्मेवार नेतात नापं विवाद समाधान उपसमितिया बैठकय् मवनेगु यानाच्वंगु प्रसंग न्ह्यःथनादिसें शर्मां संविधानप्रति उमिगु प्रतिबद्धताय् नापं न्ह्यसः थंगु दु । प्यंगू बुँदे सहमति कार्यान्वयन मजूत्तले सदन न्ह्याके मबीगु वय्कःया दाबी दु ।
