नारायणकाजीपाखें स्वंगू दलया बैठक बहिष्कार

भारतलिसे पीडीए सम्झौता यानाः राष्ट्रघात याःगु द्वपं

येँ/ भारतलिसे माथिल्लो कर्णाली जलविद्युत आयोजना विकास सम्झौता (पीडीए) याःगु न्ह्यःथना एकीकृत नेकपा माओवादीया न्वकु नारायणकाजी श्रेष्ठ ‘प्रकाशं’ स्वंगू दलया बैठक बहिष्कार यानादीगु दु ।

सरकारं राष्ट्रिय हित अःखः पीडीए सम्झौता याःगु न्ह्यःथनादिसें श्रेष्ठं प्रधानमन्त्री निवास बालुवाटारय् थौं ग्वसाः ग्वःगु बैठक बहिष्कार यानादीगु खः । बालुवाटार थ्यंकादीम्ह श्रेष्ठं प्रधानमन्त्रीं राष्ट्रघातया न्हूगु अध्याय न्ह्याकूगु द्वपं बियादिसें बैठक त्वःताः झायादीगु खः ।

हलिमया हे दकले दंगु माथिल्लो कर्णाली आयोजनायात थिकयेक सम्झौता यानाः राष्ट्रघात याःगु वय्कःया द्वपं खः । भारतलिसेया पीडीए सम्झौता विहीवाःया मन्त्रिपरिषद् बैठकं अनुमोदन याःगु खः ।