संविधान निर्माणय् सभासद्पिं प्रतिबद्ध दु : डा. भट्टराई

थः ख्याच्वःपाखें मग्याइम्ह व्यक्ति जूगु दाबी

येँ/ संविधानसभाअन्तर्गत संवैधानिक, राजनीतिक संवाद लिसे सहमति समितिया सभापति डा. बाबुराम भट्टराईं संविधान निर्माणय् सभासद्पिं गम्भीर मदु धइगु द्वपं न्ह्याक्को हे ब्यूसां इलय् संविधान बीत प्रतिबद्ध दु धइगु खनेदुगु धयादीगु दु ।

सभासद्तय्सं ल्ह्वंगु थीथी न्ह्यसःया लिसः बियादिसें डा. भट्टराईं संविधान निर्माणय् थःम्हं नेतृत्व यानागु समिति व फुक्क सभासद्पिं प्रतिबद्ध दुगु धयादिल ।

थीथी बिचाः व दर्शनया प्रतिनिधित्व संविधानसभाय् दुगु हुनिं असहमति कायम जुइगु स्वभाविक जूगु धयादिसें डा. भट्टराईं सभासद्तय्सं ब्यूगु सुझावकथं हे समिति न्ह्यःने न्ह्याइगु धयादीगु दु ।

अनिश्चितकालतक्क संविधान मदयेकेगु छुट मदुगु धयादिसें वय्कलं संविधान निर्माणय् संघीयता, गणतन्त्र, शासकीय स्वरूपलगायतया विषयसं असहमति कामय दुसां उगु विषययात हल यायेगु नितिं फुक्क राजनीतिक दल प्रतिबद्ध दुगु विश्वास प्वंकादीगु दु ।

दलत थीथी विषयसं असहमत जूसां नं संविधान जारी यायेगु विषयसं सहमति जूगु न्ह्यःथनादिसें वय्कलं वाम व दक्षिणपन्थी निगुलिं प्रवृत्तिपाखें ताःपानाः मंकाः सहमतिया आधारय् सहमति व सम्झौताया संविधान दयेकेगु प्रतिबद्धता प्वंकादीगु दु ।

भट्टराईं दुने व पिनेया शक्तिप्रति थःगु शंका मदुगु न्ह्यःथनादिसें अज्याःगु शंकायात परास्त यायेत इलय् संविधान दयेकेमाःगुलिइ बहः बियादिल । वय्कलं संविधान मदयेकेमा धइगु शक्तिपाखें सतर्क जुयाः संविधान निर्माण प्रक्रियाय् न्ह्यःज्यायेत फुक्क राजनीतिक दल व सभासद्तय्त इनाप नापं यानादिल । ख्याच्वः व हाथ्यापाखें तुति खाकीम्ह मनू थः मजूगु धयादिसें भट्टराईं धयादी, ‘जि छु नं पंगःलिसे ग्यायेमखु व सु नं ग्यायेमज्यू ।’

देय्या राजनीतिक अवस्था व राजनीतिक शक्ति सन्तुलनया विशिष्ट मोडय् सामान्य नियमया आधारय् न्ह्यःने न्ह्याये मफइगु बिचाः तयादिसें वय्कलं परम्परागत आधारय् स्वयाः नं क्रमभंगताया आधारय् न्ह्यःने न्ह्यायेमाःगु खँय् बहः बियादीगु दु ।

संविधान सामान्य प्रकृतिया मजूसे दीगो शान्ति पलिस्था यायेगु, न्यय्दँ, सच्छिदँया नितिं दयेकेगु बिचाः तयादिसें वय्कलं छगू पक्षं धाःथेंज्याःगु सहमति मखु, सकसिनं थःगु अडानपाखें लिचिलाः मंकाः सहमति दयेकेमाःगु बिचाः प्वंकादीगु दु ।