सम्मेलन मजूगुलिइ जिपिं दोषी मखु : वैद्य
मिडियापाखें बुखँयात मेगु हे रूप ब्यूगु द्वपं
यल/ नेकपा–माओवादीया नायः मोहन वैद्यं सर्वपक्षीय राजनीतिक सम्मेलन जुइ मफुगुलिइ थःपिनिगु पार्टी दोषी मजूगु धयादीगु दु । सञ्चारमाध्यमय् बुखँयात मेगु हे रूप बियाः थःपिंत दोषी व बदनाम यायेत स्वःगु धयादिसें वैद्यं असन्तुष्टि प्वंकादीगु दु ।
‘छिकपिं श्रमजीवी पत्रकारपिं खः, तर छिकपिनि मालिक मेगु हे कथंयाःपिं थें जिमित ताल,’ वैद्यं पत्रकारपिनिगु न्ह्यःने धयादी, ‘दुःख मतायेमा, जिमिगु बिचाःत गुगु कथं न्ह्यःब्वयेमाःगु खः, उगु कथं न्ह्यःब्वःगु मदु ।’
केन्द्रीय पार्टी स्कूल विभागपाखें थौं ग्वसाः ग्वःगु नेवाः लिसे ताम्सालिङ राज्यस्तरीय प्रशिक्षक एवं प्रशिक्षण स्कूलिङ ज्याझ्वःया उलेज्या यानादिसें वैद्यं थःगु पार्टीं तःगु मागया सम्बन्धय् सरकार, नेपाली कांग्रेस, नेकपा एमाले लिसे एमाओवादी गम्भीर मजूगु न्ह्यःथनादिसें असन्तुष्टि प्वंकादीगु दु ।
संविधानया अन्तर्वस्तु लिसे विधि, प्रक्रिया व ढाँचाबारे थःगु पार्टीं काःगु बिचाःयात लिखितरूप बीत अस्वीकार यायेवं सर्वपक्षीय राजनीतिक सम्मेलनय् ब्वति मकयागु नायः वैद्यया धापू खः ।
