बेपत्ता छानबिन आयोग याकनं हे नीस्वनीगु : मन्त्री आचार्य

येँ/ कानुन तथा न्यायमन्त्री नरहरी आचार्यं बेपत्ता यानातःपिं मनूतय्गु छानबिन व सत्य निरुपण लिसे मेलमिलाप आयोग याकनं हे नीस्वनीगु धयादीगु दु ।

सामाजिक न्याय लिसे मानवअधिकार समितिया बैठकय् संवैधानिक परिषद्या नायःलिसे प्रधानमन्त्री सुशील कोइरालायापाखें लिसः बियादिसें मन्त्री आचार्यं आयोग नीस्वनेगु सम्बन्धी ज्यायात सरकारं तीब्र गतिइ न्ह्यःने न्ह्याकाच्वंगु जानकारी बियादीगु खः ।

निगुलिं आयोगय् पदाधिकारी नियुक्तिया नितिं सिफारिस यायेत नीस्वंगु समितिं पदाधिकारी सिफारिस यायेगु ज्या लगभग लिपांगु चरणय् थ्यंगु दाबी यानादिल । राष्ट्रिय मानवअधिकार आयोगय् नापं पदाधिकारी नियुक्तिया तयारी जुयाच्वंगु वय्कलं धयादिल ।