वैकल्पिक उपायबारे लिखित सहमति मजूत्तले सम्मेलनया औचित्य मदु : वैद्य
येँ/ सर्वदलीय राजनीतिक सम्मेलनया नीतिगत मार्गचित्रबारे लिखित सहमति कायम मजूत्तले उगु सम्मेलनय् नेकपा–माओवादीया नेतृत्वय् दुगु स्वीस्वंगू दलीय मोर्चां ब्वति मकाइगु जूगु दु ।
माओवादीया नायः मोहन वैद्यं थौं जारी याःगु विज्ञप्तीइ धयातःगु दु ‘दलतदथुइ वार्ता व संवाद जारी यासें सम्मेलनया कार्यसूची, सहमतिं निर्णय यायेफुगु क्षेत्राधिकार व सम्मलेनपाखें सम्बोधन यायेमफइगु विषयसं सहमति कायम यायेगु वैकल्पिक उपायबारे लिखित सहमति मजूत्तले सर्वदलीय सम्मेलनया औचित्य मदु ।’
शाब्दिक रूपय् सर्वदलीय सम्मेलन यायेगु धाःसां नं उकिया कार्यसूची, क्षेत्राधिकारलगायतया विषयसं सत्तारुढ दलत सहमत जुइमफुगुलिं सम्मेलनय् थःपिं ब्वति कायेमफइगु नायः वैद्यं स्पष्ट यानादीगु दु ।
विज्ञप्तीइ धयातःगु दु, ‘सर्वदलीय सम्मेलनयात संविधानया विषयसं जक सीमित तयेगु, उकिइ नं दलतय्गुपाखें सल्लाह व सुझाव कायेगु प्रकृतिया दयेकेगु, सम्मेलनपाखें छु नं राजनीतिक निर्णयत कायेमफइगु, सम्मलेनया पूर्वतयारी, कार्यसूची व कार्यक्षेत्र व प्यंगू दलया दथुइ छु नं लिखित सहमति नं यायेमफइगु सत्तारुढ दलतय्गुपाखें धायेवं उगु सम्मलेनया छु नं अर्थ व औचित्य खनेमन्त ।’
