सम्मेलनय् ब्वति कायेत वंपिं शीर्ष नेता अथेहें लिहाँवन
आः सम्मेलन हे मजुइगु कानुनमन्त्रीया संकेत
येँ/ नेकपा–माओवादी नेतृत्वया स्वीस्वंगू दलीय मोर्चां थःपिनिगु हे मागकथं जुइत्यंगु राजनीतिक सभाय् ब्वति मकायेगु धायेवं बानेश्वर थ्यनेधुंकूपिं स्वंगू दलया शीर्ष नेतात अथेहें लिहाँवनेमाल ।
प्रधानमन्त्री सुशील कोइराला, उपप्रधानमन्त्री वामदेव गौतम, एमाओवादीया नायः पुष्पकमल दाहाल, नेता डा. बाबुराम भट्टराई, कानुनमन्त्री नरहरी आचार्यलगायतया नेता सम्मेलनय् ब्वति कायेत बानेश्वरसं च्वंगु ल्होत्से हल थ्यनेधुंकूगु खः ।
तर छुं ईलिपा थ्यंके धाःपिं नेकपा–माओवादीं लिपांगु इलय् वयाः ब्वति मकायेगु निर्णय याःगु खः । प्रधानमन्त्रीं सम्मेलनस्थलपाखें हे नेकपा–माओवादीया नायः मोहन वैद्ययात फोन याःगु खः । फोनय् वैद्यं थःपिं ब्वति मकायेगु धायेवं प्रधानमन्त्रीं थःत दुःख ताःगु धयादीगु खः ।
अनंलिपा सञ्चारकर्मीलिसे खँल्हाबल्हा यानादिसें कानुनमन्त्री नरहरी आचार्यं आः हाकनं राजनीतिक सम्मेलन हे मजुइगु संकेत यानादिल । वय्कलं आः संविधानसभां थःगु प्रक्रियाकथं ज्या न्ह्यःने न्ह्याकेगु धयादीगु दु ।
