एमाओवादीया भद्र नेता लिसे न्वकु बोगटी मन्त
लिपांगु बिचाः हायेकेगु नितिं ९ बजे पेरिसडाँडा व ११ बजे खुलामञ्चय् तइगु
येँ/ एमाओवादीया भद्र नेता लिसे न्वकु पोष्टबहादुर बोगटी थौं सुथय् ६२ दँया उमेरय् मन्त । बोगटीयात बिहीवाः हृदयघातलिसे मस्तिष्कघात जुइवं अस्पताल भर्ना याःगु खः ।
वय्कः मदुगु एमाओवादीया वरिष्ठ नेता डा. बाबुराम भट्टराईं ट्वीट यानाः पुष्टि याःगु खः । वय्कलं ट्वीटय् च्वःगु दु, ‘सहयोद्धा क. पोष्टबहादुर बोगटीया थौं सुथय् दुःखद् निधन जूगु दु । वय्कःप्रति हार्दिक श्रद्धासुमन व परिवारजनय् समवेदना ! लिपांगु लालसलाम क.दिवाकर !’
कृत्रिम श्वास–प्रश्वास यन्त्रय् तयातःम्ह बोगटीयात चच्छियंक ज्वर कुहाँमवःगु खः । वय्कःया श्वास प्रश्वासय् छक्वलं उतारचढाव वःगु खः । बोगटीयात बिहीवाः बहनि गंगालाल हृदय केन्द्र यंकूगु इलय् मुटुया नशाय् शतप्रतिशत पंगः खनेदुगुया नापनापं मुटुया चाल नापं तसकं म्हो जक दुगु खः । गंगालालया वरिष्ठ मुटु रोग विशेषज्ञ डा. यादव भट्टं बहनि छताः इलय् बोगटीया एन्जियोप्लास्टि याःगु खः । डा. भट्टराईयाकथं एन्जियोप्लास्टिलिपा मुटुसम्बन्धी समस्या तत्कालया नितिं समाधान जूसां नं मुटुया चाल म्हो जूगुलिं मस्तिष्कघात नापं जूगु खः । बोगटीयात स्नायुसम्बन्धी थप उपचारया नितिं शुक्रवाः सनिलय् नर्भिक अस्पताल रिफर याःगु खः ।
बोगटीया वंगु छवाः न्ह्यःनिसें स्वास्थ्य अवस्था पाय्छि मदुगु खः । वय्कलं थःत ज्यामछिना वःगु थेंज्याःगु अनुभव यानाः वयाच्वंगु खः । सुं सुं चिकित्सकया दाबीकथं एमाओवादीया बैठकया इलय् बोगटीया हृदयघातया लक्षण खनेदुगु खः । बैठकय् छाती स्याःगु, चःति वःगु आदि समस्यालिपा वय्कः छेँय् लिहाँ झायादीगु खः । छेँय्पाखें बहनि वय्कःयात गंगालाल अस्पताल यंकूगु खः ।
वय्कःया सीम्हयात आः सुथय् ९ बजे पार्टी मू ज्याकु पेरिसडाँडाय् बिचाः हायेकेगु नितिं यंकूगु दु । लिपांगु बिचाः हायेकेगु नितिं वय्कःया सीम्हयात खुलामञ्चय् तइगु एमाओवादीया नेता हिमाल शर्मां जानकारी बियादीगु दु ।
