सरकार मस्त संरक्षण व अधिकारया प्रबद्र्धनय् प्रतिबद्ध : मन्त्री सिंह
येँ/ उपप्रधानमन्त्री लिसे स्थानीय विकासमन्त्री प्रकाशमान सिंहं सरकारं मस्त संरक्षण व अधिकारया प्रबद्र्धन यायेत थप लगानी अप्वयेकेगु धयादीगु दु ।
राष्ट्रिय बाल दिवस–२०७१ मूल समारोह समितिं थौं येँ ग्वसाः ग्वःगु छगू ज्याझ्वलय् न्ववानादिसें वय्कलं मस्तय्गु शिक्षा, स्वास्थ्यलगायत अधिकारया सुनिश्चित यायेत सरकारं लगानीइ वृद्धि यायेगु धयादिल ।
उपप्रधानमन्त्री सिंहं बालमैत्री संविधान निर्माण यानाः फुक्क मस्तय्गु अधिकार सुनिश्चित यायेगु न्ह्यःथनादिसें कानुनी रूपं हे मस्तय्त धिसिलाःगु आधार सिर्जना यायेत सरकार प्रतिबद्ध दुगु धयादिल । वय्कलं मस्तय्त जुइगु शारीरिक व मानसिक सजाँय अन्त्य यायेगु अभियानय् फुक्कसिन सक्रिय भूमिका म्हितेत इनाप नापं यानादिल ।
महिला, बालबालिका लिसे समाज कल्याणमन्त्री निलम केसीं न्हापाया तुलनाय् मस्तय्गु विषयसं राष्ट्रिय प्राथमिकता दुगु व उपिंदथुइ जुइगु यानाच्वंगु फुक्क कथंया हिंसा अन्त्यया नितिं मन्त्रालय प्रतिबद्ध दुगु धयादिल ।
वय्कलं बालमैत्री वातावरणय् मस्तय्त शिक्षा बीमाःगु व उमित शारीरिक व मानसिक रूपं लिच्वः लाइकथंया छु नं क्रियाकलाप यायेमज्यूगु खँय् बहः नापं बियादीगु दु ।
