कार्टमण्डप डटकम पाखें ८ लखया राहत इन
छुं न्हि न्ह्यवनिसें देसय् चलःवनां छेँ, बुँ लिसें थःथिति समेत तंकाः दुःखसियाच्वंपिंत राहत इने कथं कार्टमण्डप डटकमं न्ह्याकूगु फिल द बकेटया अनलाइन अभियानं थ्यंमथ्यं ८ लख मुंकाः राहत लःल्हाःगु दु ।
बाढी पीडिततय्त ग्वहालि याये कथं न्ह्याःगु सोसल क्याम्पेन 'फिल द बकेट' अभियान कथं छगः बाल्टिनय् जाकि, मायकेँ, लः, चाउचाउ, साबुं, ब्रस व मञ्जन, लः शुद्ध यायेगु वासः, बिस्कुट, ट्याब सितामोल, ट्याब प्रोटोजल लिसें जीवनजल आदि द्वःछि तका ध्यबा बराबरया सामान तःगु खः ।
निवाः ति न्ह्यवनिसें कार्टमण्डप डटकमं थःगु वेवसाइटपाखें अनलाइन ग्वहालिया लागिं इनाप याःगु खः । छगः बाल्टिनया १० डलरया कथं इनाप याःगु खःसा ४८ घौ दुने हे १५९ म्हेसिनं २८२ गः बाल्टिनया लागि मुनेज्या जूगु खः । छम्हेसिनं हे छगः, निगः, न्यागः, झिगःलिसें झिंनिगः तक बाल्टिन ब्यूपिं खः । लिपांगु न्हि शुक्रवाःतक मुक्कं ७९६ गः बाल्टिन मुंगुलिइ वःगु खःसा कार्टमण्डप थःहेसियां नं प्यगः बाल्टिन तयाः मुक्कं ८०० गः बाल्टिन दःवःगु खः ।
वंगु वालय् १०० गः बाल्टिन पश्चिमय् चलः वंगु थाय् फत्तेपुरया ८ व ९ नं. वडाय् इने धुंकूगु दु । बांकिगु ७०० गः बाल्टिन शनिवाः महेन्द्र पुलिस क्लवय् मुंकूगु दुसा आइतवाः पुलिस क्लबया गाडिं सुर्खेतय् यंकीगु धाःगु दु ।
नेपालमण्डल फाउण्डेशनया ग्वहालिइ कार्टमण्डप डट कमया थुगु अभियानय् ग्वहालि यानादीपिं सकसितं कार्टमण्डप डटकमं सुभाय् ब्यूगु दु । देशविदेशं थुगु अभियानय् ग्वहालि यानादीपिनिगु नां धलः थुगु पेजय् स्वयादीफइ ।
